భక్తుల రద్దీ.. శ్రీవారి సర్వదర్శనానికి 15 గంటల సమయం

తిరుమల తిరుపతి దేవస్థానంలో(Tirumala Tirupati Devasthanam) భక్తుల రద్దీ కొనసాగుతుంది. వైకుంఠం క్యూ కాంప్లెక్స్ లోని అన్ని కంపార్ట్‌మెంట్లు నిండిపోయి భక్తులు వెలుపల క్యూ లైన్‌లో వేచి ఉన్నారు. శ్రీవారి సర్వదర్శనానికి(Srivari Sarva Darshan) 15 గంటల సమయం పడుతోందని ఆలయ అధికారులు ప్రకటించారు. 67,284 మంది భక్తులు గురువారం శ్రీవారిని దర్శించుకున్నారు. 31,268 మంది భక్తులు తలనీలాలు సమర్పించారు. రూ.3.34 కోట్లు హుండీ ఆదాయం వచ్చినట్లు టీటీడీ అధికారులు శుక్రవారం వెల్లడించారు.

తిరుమల సమాచారం

తిరుమలలో తిరుచానూరు శ్రీపద్మావతి అమ్మవారి ఆలయం(Sri Padmavathi Ammavari Temple)లో నేడు తిరుచ్చి ఉత్సవం నిర్వహించనున్నారు. అలిపిరి సమీపంలో ఉన్న భూదేవి కాంప్లెక్స్ శ్రీవారి మెట్టు మార్గంలో నడిచే భక్తులకు టోకెన్ల జారీని ప్రారంభిస్తుందని తిరుమల తిరుపతి దేవస్థానం (TTD) ప్రకటించింది. ఈ నెల 6వ తేదీ సాయంత్రం 5 గంటల నుండి టోకెన్లు అందుబాటులోకి వస్తాయి. గతంలో, భక్తులు మార్గం మొదటి మెట్టు దగ్గర టోకెన్లను సేకరించి 1,200వ మెట్టు వద్ద స్కాన్ చేసేవారు. ఇది ఇబ్బందికరంగా మారింది.

ఈ సవాళ్లను ఎదుర్కొనేందుకు, దివ్య దర్శన టోకెన్ల జారీని సులభతరం చేయడానికి శ్రీనివాస మంగాపురంలో శాశ్వత కౌంటర్లను ఏర్పాటు చేయాలని అధికారులు నిర్ణయించారు. ఆ కౌంటర్లు పనిచేసే వరకు, భూదేవి కాంప్లెక్స్‌లో(Tirumala Bhudevi Complex) టోకెన్లు జారీ చేయడం కొనసాగుతుంది. ఈ కాంప్లెక్స్‌లో దివ్య దర్శన టోకెన్ల కోసం 4 సమయానుకూల సర్వ దర్శన టోకెన్ల కోసం 6 కలిపి మొత్తం 10 కౌంటర్లు ఉంటాయి. భక్తులను మొదట బాలాజీ బస్టాండ్ ప్రాంగణంలోని షెడ్‌లలోకి అనుమతిస్తారు. టోకెన్ సేకరణ ప్రక్రియను క్రమబద్ధీకరించడానికి క్యూ లైన్లలో ఏర్పాటు చేస్తారు. భూ దేవి కాంప్లెక్స్ లోనే మరోపక్క ఎస్ఎస్ డీ టోకెన్లు కూడా జారీ చేయనున్నట్లు టీటీడీ ప్రకటించింది.