కలుషిత నీరే కారణమా?

పరిస్థితిని సమీక్షిస్తున్న అధికారులు

కామారెడ్డి, (విజయక్రాంతి): తీవ్ర విరేచనాలతో ఇద్దరు వ్యక్తులు మృతి చెందిన ఘటన కామారెడ్డి జిల్లాలో బుధవారం నెలకొంది. స్థానికుల కథనం ప్రకారం వివరాలు ఇలా ఉన్నాయి.కామారెడ్డి జిల్లా తాడ్వాయి మండలం దేమికలాన్ గ్రామానికి చెందిన కొనింటి చిన్న భూమయ్య (60),మెట్టు స్వామి( 32) తీవ్ర విరోచనాలతో మృతి చెందారని గ్రామస్తులు తెలిపారు. స్థానిక ప్రజలు తెలిపిన వివరాల ప్రకారం గత మూడు రోజులుగా గ్రామస్తులు విరేచనాలు, వాంతులుతో బాధపడుతున్నట్లు తెలిపారు. పదిమంది వివిధ ప్రైవేట్, ప్రభుత్వ ఆసుపత్రులలో చికిత్స పొందుతున్నారని తెలిపారు. ఇలా ఒక్కసారే అందరూ అనారోగ్యానికి గురికావడంతో గ్రామస్తులు భయాందోళనకు గురవుతున్నారు.  కలుషిత నీరు తాగడమే ఇందుకు కారణమా? లేదా మరేదైనా కారణమా? అనే కోణంలో సంబంధిత అధికారులు పరిశీలిస్తున్నారు. విషయం తెలుసుకున్న స్థానిక గ్రామపంచాయతీ, ఆరోగ్య శాఖ అధికారులు వైద్య శిబిరం ఏర్పాటు చేసి పరిస్థితిని ఎప్పటికప్పుడు సమీక్షిస్తున్నారు. అస్వస్థతకు గురైన వారికి చికిత్సలు అందిస్తున్నారు.