హనుమకొండ (విజయక్రాంతి): కాజీపేట రైల్వే మ్యానుఫ్యాక్చరింగ్ యూనిట్ పనులను కేంద్ర మంత్రి కిషన్ రెడ్డి ప్లాంట్ అధికారులతో కలిసి పరిశీలించారు. అనంతరం మాట్లాడుతూ కాజీపేటలో రైల్వే మ్యానుఫ్యాక్చరింగ్ యూనిట్ కల సహకారం కాబోతుందని అన్నారు. తక్కువ సమయంలో సమస్యలు అధిగమించి చాలా వేగంగా నిర్మాణ పనులు జరుగుతున్నాయని అన్నారు. రైల్ వికాస్ నిగేమ్ లిమిటెడ్ షెడ్యూల్ ప్రకారం పనులు పూర్తి చేస్తుందని, ఈ యూనిట్ 160 ఎకరాల్లో నిర్మాణం జరుగుతుందన్నారు. దీనికి 521 కోట్ల నిధులను ఖర్చు పెడుతున్నామని, ఆధునిక పరికరాలను అందుబాటులోకి తీసుకురాబోతున్నామన్నారు.

ఈ నిర్మాణంలో 75% పనులు పూర్తయ్యాయని, ఇక్కడ 16 కోట్లతో కూడిన రాక్స్ ఉత్పత్తి జరగబోతుందన్నారు. ఇక్కడ తయారయ్యే ఉత్పత్తులు అన్ని రాష్ట్రాలకు సరఫరా చేసే అవకాశం ఉందన్నారు. ఉద్యోగాల విషయంలో కూడా స్థానికులకే అధిక ప్రాధాన్యత ఉంటుందని ఈ సందర్భంగా తెలియజేశారు. గూడ్స్ రైల్వే శాఖకు ప్రధాన ఆదాయం అని, ఏకకాలంలో 40 రైల్వేస్టేషన్లో అభివృద్ధి చేయడం దేశ చరిత్రలోనే ప్రధమన్నారు. తెలంగాణలో 100% ఎలక్ట్రిఫికేషన్ జరిగిందనీ, రైల్వే ద్వారా ప్రయాణికులకు మెరుగైన వసతులు కల్పిస్తున్నామన్నారు. దశాబ్దాల కాలంగా పెండింగ్లో ఉన్న రైల్వే ఓవర్ బ్రిడ్జిలు, అండర్ బ్రిడ్జిలు త్వరలోనే పూర్తి చేస్తామన్నారు.

అయోధ్యపురం రైల్వే మ్యానుఫ్యాక్చరింగ్ యూనిట్కు భూమి కోల్పోయిన భూ నిర్వాసితులు మంత్రిని కలిసి తమ గోడును విన్నవించుకున్నారు, కొంతమంది భూ నిర్వాసితులకు నష్టపరిహారం రాలేదు అన్న విషయాన్ని మంత్రి దృష్టికి రైతులు తీసుకువచ్చారు. వెంటనే స్పందించిన కేంద్ర మంత్రి భూనిర్వాసితులకు ఉద్యోగాల విషయాలపై రైల్వే అధికారులతో మాట్లాడి నిర్ణయం తీసుకుంటామన్నారు. మిగతా వారికి నష్టపరిహానాన్ని వెంటనే చెల్లించేలా చర్యలు తీసుకోవాలని అధికారులకు ఆదేశాలు జారీ చేశారు. ఈ కార్యక్రమంలో బీజేపీ హనుమకొండ జిల్లా అధ్యక్షుడు సంతోష్ రెడ్డి, రావు పద్మ, మార్తినేని ధర్మారావు, మాజీ ఎమ్మెల్యే ఆరూరి రమేష్, బీజేపీ రాష్ట్ర నాయకులు జలగం రంజిత్, బీజేపీ జిల్లా నాయకులు పొనగోటి వెంకట్ రావు, తులసి కళ్యాణి, కార్పొరేటర్ చాడ స్వాతి, రావుల కోమల, గుజ్జుల వసంత, నాను నాయక్ తదితరులు పాల్గొన్నారు.