గోదావరిలో తెలంగాణ వాటను వదులుకునే ప్రసక్తే లేదు..

బీఆర్ఎస్వీ జిల్లా అధ్యక్షుడు బడికల శ్రావణ్..

బెల్లంపల్లి అర్బన్ (విజయక్రాంతి): చంద్రబాబుతో చీకటి ఒప్పందం చేసుకున్నా రేవంత్ రెడ్డిని వదిలిపెట్టే ప్రసక్తే లేదని, బనకచర్ల ప్రాజెక్టు(Banakacherla Project)ను అడ్డుకుంటామని బీఆర్ఎస్వీ జిల్లా అధ్యక్షుడు బడికల శ్రావణ్(TRSV District President Badikala Sravan) అన్నారు. బెల్లంపల్లి ప్రభుత్వ జూనియర్ కళాశాలలో మంగళవారం బీఆర్ఎస్వీ ఆధ్వర్యంలో విద్యార్థులకు ఏర్పాటుచేసిన అవగాహన కార్యక్రమంలో ఆయన పాల్గొని మాట్లాడారు. బనకచర్ల ద్రోహాన్ని బద్దలు కొట్టి ఆంధ్రప్రదేశ్ జలదోపిడిని అడ్డుకొని తీరుతామని స్పష్టం చేశారు. సీఎం రేవంత్ రెడ్డి సహకారంతో ఆంధ్రప్రదేశ్ ప్రభుత్వం అక్రమంగా నిర్మించనున్న బనకచర్ల ప్రాజెక్ట్ తో తెలంగాణకు జరిగే అన్యాయంపై విద్యార్థులకు అవగాహన ఉండాలన్నారు. 

పోలవరం ప్రాజెక్టు నుంచి 200 టీఎంసీల గోదావరి జలాలను రాయలసీమకు తరలించడం కోసం ఏపీ నిర్మించతలపెట్టిన అక్రమ ప్రాజెక్టే పోలవరం-బనకచర్ల లింకు ప్రాజెక్టు, పక్క రాష్ట్ర ముఖ్యమంత్రి చంద్రబాబు అడుగులకు మడుగులు ఒత్తుత్తు ఈనాడు తెలంగాణ రాష్ట్రం నీళ్లను ఆంధ్రకు దోచిపెట్టడానికి రేవంత్ రెడ్డి చీకటి ఒప్పందాలకి చరమగీతం పాడాలన్నారు. అదేవిధంగా విద్యార్థులకు ఇచ్చిన హామీలను గాలికి వదిలేయడం దుర్మార్గమని విమర్శించారు. ఇంత వరకు స్కాలర్షిప్లు ఇవ్వలేదనీ, విద్యార్థులకు ఇస్తామన్న ఐదు లక్షల విద్య భరోసా కార్డు లు లేవని, విద్యార్థినిలకు స్కూటీలు ఇవ్వలేదని దుయ్యబట్టారు. అధికారంలోకి రాగానే నిరుద్యోగులకు రెండు లక్షల ఉద్యోగాలు ఇస్తామని సీఎం మోసం చేశారని విమర్శించారు. 

ఎస్సీ ఎస్టీ విద్యార్థులు పది పాస్ అయితే రూ.10 వేలు, ఇంటర్మీడియట్ పాస్ అయితే రూ.15 వేలు, డిగ్రీ పాస్ అయితే రూ.25 వేలు , పీజీ పాస్ అయితే రూ. లక్ష, ఏం ఫీల్, పిహెచ్డి పూర్తిచేస్తే రూ.5 లక్షలు ఇస్తామని ఘోరంగా రేవంత్ రెడ్డి సర్కార్ విద్యార్థులను మోసగించిందన్నారు. తక్షణమే గోదావరి బనకచర్ల లింకు ప్రాజెక్టును రద్దు చేయాలని డిమాండ్ చేశారు. లేని పక్షంలో భవిష్యత్తులో బిఆర్ఎస్ పార్టీ లక్షల మంది విద్యార్థులతో రేవంత్ రెడ్డి ప్రభుత్వాన్ని ముట్టడిస్తామని హెచ్చరించారు. ఈ కార్యక్రమంలో బీఆర్ఎస్వీ బెల్లంపల్లి పట్టణ అధ్యక్షుడు అడెపు అరుణ్, కార్యదర్శి సుమంత్, సీనియర్ నాయకులు మురుకురి శ్రావణ్, దార రోషన్, అజయ్, విష్ణు, సాయి కిరణ్, సంతోష్ కార్యకర్తలు పాల్గొన్నారు.