ఎస్పీ డాక్టర్ సంగ్రామ్ సింగ్ జీ పాటిల్

నాగర్‌కర్నూల్, నవంబర్ 30 (విజయ్ క్రాంతి): రాష్ట్రంలో జరగనున్న గ్రామపంచాయతీ ఎన్నికల నేపథ్యంలో సోషల్ మీడియాలో రెచ్చగొట్టే పోస్టులు పెడితే కఠినంగా వ్యవహరిస్తామని జిల్లా ఎస్పీ డాక్టర్ సంగ్రామ్ సింగ్ జీ పాటిల్ హెచ్చరించారు. వాట్సాప్, ఫేస్బుక్, ట్విటర్, ఇన్స్టాగ్రామ్, టెలిగ్రామ్ వంటి అన్ని సోషల్ మీడియా వేదికలపై పోలీసులు 24 గంటల పర్యవేక్షణ కొనసాగిస్తున్నారని తెలిపారు.

ఎన్నికల సమయంలో రెండు వర్గాలు, రెండు రాజకీయ పార్టీల మధ్య ఉద్రిక్తతలు, గొడవలు రేకెత్తించే విధంగా, కించపరిచే, అవమానించే విధానంలో పోస్టులు పెట్టే వారిపై కఠిన చర్యలు తప్పవని ఎస్పీ హెచ్చరించారు. అలాంటి వ్యక్తులపై కేసులు నమోదు చేసి చట్ట ప్రకారం కఠినమైన చర్యలు తీసుకుంటామని స్పష్టం చేశారు. ఎన్నికల సమయంలో శాంతిభద్రతలు భంగం కలగకుండా ప్రతి పోస్టును, ప్రతి గ్రూప్ కార్యకలాపాలను ప్రత్యేక బృందాలు నిశితంగా పరిశీలిస్తున్నట్లు ఎస్పీ తెలిపారు.