మాటలెందుకు?

రమణా!

ఏమిటీ గోల

ఎవరు మాట్లాడకుండా ఉండలేరా

నీ మాట విని

రోజంతా నిశ్శబ్దంగా గడిపాను

మౌనం ఏ పనికి ఆటంకం కాలేదు!

మాట అక్కరలేని ప్రపంచం

ఎంతో అందంగా కనిపించింది

గాలి పలకరించింది

పరిమళం ముచ్చటించింది

ఆకలి హెచ్చరించింది

దాహం గుర్తు చేసింది

దేనికి మాటలతో పనిలేదు

మాట్లాడి మాట్లాడి మనం

డొల్లగా మిగిలిపోతున్నామా?

మొన్నీమధ్య మాట్లాడుకుందాం రా అని

వైట్‌హౌస్‌లో ఇద్దరు

ఒకరిమీద ఒకరు దుమ్మెత్తుకు పోసుకుని

ఎవరి దారిన వారు విడిపోయారు! 

సొరంగంలో ఎనిమిదిమంది మనకోసం

ప్రాణాలను గాలిలో కలిపేసుకుంటుంటే

బయట ఎంతమంది ఎంత గోల

ఇప్పుడు మాట్లాడడం

నాకు మహా సిగ్గనిపిస్తుంది!

ఏమి మాట్లాడకుండానే

అనాదిగా ఆకాశం, హిమాచలం

ఎంతో ప్రశాంతంగా ఉన్నాయి

మా నల్లకుక్క అంతే

తనకిష్టం లేనప్పుడు

దొంగలు వచ్చిపోయినా మొరగదు

దానికదో తృప్తి!

నీ ఆశ్రమ దర్శనానంతరం

కలిసిమెలిసి బ్రతకడం అంటే

మౌనంలోకి జారిపోవడమే

జీవితమూ జీవమూ అనిపించింది!!

- కోట్ల వెంకటేశ్వర రెడ్డి