ఖానాపూర్‎లో పుట్టగొడుగుల్లా అక్రమ నిర్మాణాలు!

మణికొండ, నవంబర్ 7 (విజయక్రాంతి): నగర శివార్లలో అక్రమ నిర్మాణాలు పుట్టగొడుగుల్లా వెలుస్తున్నాయి. ప్రభుత్వం ఎన్ని నిబంధనలు విధించినా, చట్టాలు తీసుకొచ్చినా కొందరు వాటిని ఖాతరు చేయడం లేదు. రాజేంద్రనగర్ పరిధిలోని ఖానాపూర్ పరిసర ప్రాంతాల్లో జీవో 111 నిబంధనలకు విరుద్ధంగా భారీ నిర్మాణాలు చేపడుతున్నారనే ఆరోపణలు వెల్లువెత్తుతున్నాయి. ఎలాంటి ముందస్తు అనుమతులు లేకుండానే వాణిజ్య సముదాయాలు (Commercial Sheds), గోదాములు (Warehouses) నిర్మిస్తున్నట్లు స్థానికులు ఆరోపిస్తున్నారు.

ఖానాపూర్ పరిధిలో భారీ వాణిజ్య గోదాము నిర్మాణం దాదాపు తుది దశకు చేరుకుంది. మెటల్ షీట్ల ఏర్పాటు, ప్రహరీ గోడల నిర్మాణ పనులు వేగంగా కొనసాగుతున్నాయి. అయితే ఈ నిర్మాణానికి సంబంధించి మున్సిపల్, టౌన్ ప్లానింగ్ అధికారుల అనుమతులు ఉన్నాయా? లేదా? అన్నదానిపై స్పష్టత లేదు. నిబంధనలకు విరుద్ధంగా నిర్మాణాలు జరుగుతున్నాయన్న ఆరోపణలపై అధికారులు స్పందించాల్సిన అవసరం ఉంది.

ఇంత భారీ స్థాయిలో నిర్మాణ పనులు జరుగుతున్నా సంబంధిత అధికారులు పట్టించుకోవడం లేదని స్థానికులు అసహనం వ్యక్తం చేస్తున్నారు. అధికారుల పర్యవేక్షణ కొరవడటంతోనే నిబంధనల ఉల్లంఘనలు జరుగుతున్నాయనే విమర్శలు వినిపిస్తున్నాయి. ఇప్పటికైనా ఉన్నతాధికారులు స్పందించి నిర్మాణ అనుమతులపై సమగ్ర విచారణ (Investigation) చేపట్టాలని స్థానికులు డిమాండ్ చేస్తున్నారు. నిబంధనల ఉల్లంఘన జరిగినట్లు తేలితే బాధ్యులపై చట్టపరమైన చర్యలు తీసుకోవాలని కోరుతున్నారు