గుంటల లెక్కన పట్టాలు

22-11-2026 | 04:49pm

బోథ్, నవంబర్ 22 (విజయక్రాంతి): బోథ్ నియోజకవర్గంలోని బోథ్, సోనాల, నేరడిగొండ మండలాల్లో అనుమతులు లేని వెంచర్లు పుట్టగొడుగుల్లా వెలుస్తున్నాయి. నూతనంగా ఏర్పాటైన సోనాల మండలంలో వ్యాపార కార్యకలాపాలు పెరుగుతుండటంతో వివిధ ప్రాంతాల నుంచి వచ్చిన వ్యాపారులు స్థానికంగా నివాసం ఏర్పరచుకునేందుకు ఇంటి స్థలాలు కొనుగోలు చేస్తున్నారు. ఇదే అదునుగా భావించిన కొందరు రియల్ ఎస్టేట్ వ్యాపారులు అక్రమ వెంచర్ల (Illegal Layouts) ఏర్పాటుకు తెరలేపినట్లు ఆరోపణలు వస్తున్నాయి.

మహారాష్ట్రతో పాటు నిజామాబాద్ ప్రాంతాలకు చెందిన కొందరు రియల్ ఎస్టేట్ వ్యాపారులు స్థానికంగా భూములు కొనుగోలు చేసి అనుమతులు లేకుండానే వెంచర్లు ఏర్పాటు చేసినట్లు తెలుస్తోంది. కొనుగోలుదారులకు గుంటల లెక్కన పట్టాలు (Land Registrations) చేసి విక్రయాలు జరుపుతున్నట్లు ఆరోపణలు ఉన్నాయి. సోనాల మండల కేంద్రంలో మొత్తం 8 వెంచర్లు ఉండగా, వాటిలో 3 మాత్రమే చట్టబద్ధమైనవని, మిగతా 5 అనుమతులు లేనివని స్థానికంగా చెబుతున్నారు. నేరడిగొండ మండలంలోనూ 3 లీగల్ వెంచర్లు ఉండగా, మరో 5 వెంచర్లు అనుమతులు లేకుండానే కొనసాగుతున్నట్లు సమాచారం. బోథ్ మండలంలో 13 వెంచర్లు ఉండగా, కేవలం 3 వెంచర్లకే అనుమతులు ఉన్నట్లు తెలుస్తోంది.

మూడు మండలాల్లో 25 అక్రమ వెంచర్లు

బోథ్, సోనాల, నేరడిగొండ మండలాల్లో కలిపి 11 లీగల్ వెంచర్లు ఉండగా, 25 అనుమతులు లేని వెంచర్లు ఉన్నట్లు ఆరోపణలు వినిపిస్తున్నాయి. ఈ అక్రమ వెంచర్లలో కొనుగోలుదారులకు గుంటల లెక్కన పట్టాలు చేస్తున్నారు. అనంతరం గ్రామపంచాయతీల నుంచి అనుమతులు తీసుకుని ఇళ్ల నిర్మాణాలు చేపడుతున్నట్లు తెలుస్తోంది. ఈ విధానం వల్ల ప్రభుత్వానికి రావాల్సిన రిజిస్ట్రేషన్ ఆదాయం (Registration Revenue) తగ్గిపోతోందనే విమర్శలు వ్యక్తమవుతున్నాయి.

ఎల్ఆర్ఎస్ ఆప్షన్ లేక.. ఇదే అదునుగా?

ప్రభుత్వం ఎల్ఆర్ఎస్ (LRS Scheme) ద్వారా అనుమతులు లేని లేఅవుట్లను క్రమబద్ధీకరించుకునేందుకు అవకాశం కల్పించింది. అయితే గత నాలుగు నెలలుగా సంబంధిత ఆప్షన్ అందుబాటులోకి రాకపోవడంతో కొందరు ఇదే అదునుగా భావించి గుంటల లెక్కన పట్టాలు చేస్తున్నట్లు ఆరోపణలు వస్తున్నాయి.

ఉదాహరణకు రెండు గుంటల భూమిని ఎల్ఆర్ఎస్ విధానంలో రిజిస్ట్రేషన్ చేస్తే ప్రభుత్వానికి సుమారు రూ.60 వేల వరకు ఆదాయం సమకూరుతుందని చెబుతున్నారు. అదే గుంటల చొప్పున పట్టా చేస్తే ప్రభుత్వానికి కేవలం రూ.1,500 వరకు మాత్రమే ఆదాయం వస్తోందని అంటున్నారు. మరోవైపు గుంటల చొప్పున పట్టాలు పొందేందుకు అనధికారికంగా రూ.10 వేల నుంచి రూ.12 వేల వరకు చెల్లించాల్సి వస్తోందని కొందరు లబ్ధిదారులు ఆరోపిస్తున్నారు.

ఎల్ఆర్ఎస్ ద్వారా ప్రభుత్వానికి భారీ ఆదాయం సమకూరుతుందని అంచనా వేసినప్పటికీ, ఆశించిన స్థాయిలో లావాదేవీలు జరగడం లేదనే అభిప్రాయాలు వ్యక్తమవుతున్నాయి. అక్రమ వెంచర్లలో గుంటల లెక్కన రిజిస్ట్రేషన్లు జరుగుతున్నాయనే ఆరోపణలపై సంబంధిత అధికారులు దృష్టి సారించాలని స్థానికులు కోరుతున్నారు. ప్రభుత్వ ఆదాయానికి గండి పడకుండా అక్రమ వెంచర్లపై విచారణ చేపట్టి చర్యలు తీసుకోవాల్సిన అవసరం ఉందనే డిమాండ్ వినిపిస్తోంది.

మరిన్ని వార్తలు