ప్రజల రుణం తీర్చుకుంటా.. రేవంత్ భావోద్వేగ వ్యాఖ్యలు

హైదరాబాద్: పాలమూరు ప్రాంతాన్ని అభివృద్ధి చేసి వలసలకు అడ్డుకట్ట వేయడమే తమ ప్రభుత్వ లక్ష్యమని ముఖ్యమంత్రి రేవంత్ రెడ్డి(CM Revanth Reddy) స్పష్టం చేశారు. రైతు కుటుంబం నుంచి వచ్చిన తనకు కొడంగల్ ప్రజలు ముఖ్యమంత్రి స్థాయికి ఎదిగేలా ఆశీర్వదించారని భావోద్వేగంగా పేర్కొన్నారు. లగచర్ల(Lagacherla)లో నిర్వహించిన బహిరంగ సభలో ఆయన మాట్లాడుతూ గత ప్రభుత్వ పాలనపై విమర్శలు గుప్పించారు.

75 ఏళ్లలో పాలమూరుకు న్యాయం జరగలేదు

దశాబ్దాలు గడిచినా పాలమూరు ప్రాంతంలో సాగునీటి సమస్యలు, వలసలు కొనసాగుతూనే ఉన్నాయని సీఎం అన్నారు. గతంలో అనేక ప్రాజెక్టులు చేపట్టినా పూర్తిస్థాయిలో ఫలితాలు అందలేదని విమర్శించారు. ఎంపీగా పాలమూరు నుంచి గెలిచిన కేసీఆర్ జిల్లా అభివృద్ధికి ప్రాధాన్యం ఇస్తారని ఆశించామని, కానీ ఆశించిన స్థాయిలో పనులు జరగలేదని వ్యాఖ్యానించారు. మక్తల్-నారాయణపేట ప్రాజెక్టును గత ప్రభుత్వం పక్కన పెట్టిందని ఆరోపించారు.

అప్పులు చెల్లిస్తూనే సంక్షేమం

రాష్ట్ర ఆర్థిక పరిస్థితిపై మాట్లాడుతూ గత పదేళ్లలో పన్నుల రూపంలో సుమారు రూ.20 లక్షల కోట్లు సమకూరినా రాష్ట్రాన్ని అప్పుల భారం మిగిలేలా చేశారని కేసీఆర్ ప్రభుత్వంపై విమర్శలు చేశారు. గత ప్రభుత్వ హయాంలో తీసుకున్న అప్పులకు వడ్డీ, అసలు చెల్లింపుల రూపంలో భారీగా నిధులు వెచ్చించాల్సి వస్తోందన్నారు. మూడేళ్లలో సుమారు రూ.2 లక్షల కోట్ల అప్పులు చెల్లించినట్లు వెల్లడించారు.

ఉద్యోగులకు ఒకటో తేదీనే జీతాలు

2024 జనవరి నుంచి ప్రతి నెలా ఒకటో తేదీన ప్రభుత్వ ఉద్యోగులకు జీతాలు చెల్లిస్తున్నామని సీఎం తెలిపారు. సంక్షేమ పథకాలకు సంబంధించిన నిధులను నెలలో పదో తేదీలోపు విడుదల చేస్తున్నామని, ప్రభుత్వ పనులు చేసిన కాంట్రాక్టర్లకు 20వ తేదీలోపు బిల్లులు చెల్లించేలా చర్యలు తీసుకుంటున్నామని చెప్పారు. ఆర్థిక ఇబ్బందులు ఉన్నప్పటికీ ప్రజా సంక్షేమ కార్యక్రమాలను కొనసాగిస్తున్నామని పేర్కొన్నారు.

పాలమూరు ప్రాజెక్టులపై ప్రత్యేక దృష్టి

మక్తల్-నారాయణపేట-కొడంగల్ ఎత్తిపోతల పథకాన్ని ముందుకు తీసుకెళ్లేందుకు ప్రభుత్వం కృషి చేస్తోందని రేవంత్ రెడ్డి తెలిపారు. ఈ ప్రాజెక్టును అడ్డుకుంటామంటూ కొందరు మాట్లాడుతున్నారని విమర్శించారు. పాలమూరు ప్రాంతంలో సాగునీటి సదుపాయాలు మెరుగుపరిచి రైతులకు అండగా నిలుస్తామని స్పష్టం చేశారు. కొడంగల్ ప్రజలు తనపై ఉంచిన నమ్మకాన్ని నిలబెట్టుకుంటానని, నియోజకవర్గంతో పాటు పాలమూరు సమగ్ర అభివృద్ధికి కృషి చేస్తానని సీఎం హామీ ఇచ్చారు.