చెట్టు కాదు.. విద్యుత్ స్తంభం
విద్యుత్ స్తంభాలను అల్లుకున్న తీగలు..
కేసముద్రం, నవంబర్ 18 (విజయక్రాంతి): విద్యుత్ పొదుపు(Electricity Conservation) చేయాలని ఒకవైపు ప్రభుత్వం, విద్యుత్ శాఖ అధికారులు(Electricity Department Officials) ప్రజలకు పిలుపునిస్తుంటే.. క్షేత్రస్థాయిలో మాత్రం అందుకు భిన్నమైన పరిస్థితులు దర్శనమిస్తున్నాయి. విద్యుత్ స్తంభాలను అల్లుకుంటూ వేలాడుతున్న తీగలు, పగటి వేళల్లోనూ నిరంతరాయంగా వెలుగుతున్న వీధి దీపాలు విద్యుత్ శాఖ నిర్వహణ తీరును ప్రశ్నార్థకం చేస్తున్నాయి.
పట్టపగలే విద్యుత్ దీపాలు వెలుగుతుండటంతో విలువైన విద్యుత్ వృథా అవుతున్నా సంబంధిత సిబ్బంది పట్టించుకోకపోవడం విమర్శలకు తావిస్తోంది. కేసముద్రం పట్టణంతో పాటు, గ్రామాల్లో విద్యుత్ స్తంభాలపై తీగలు ఒకదానికొకటి అల్లుకుని అస్తవ్యస్తంగా మారుతున్నాయి.
కేబుల్ వైర్లు, విద్యుత్ తీగలు గందరగోళంగా ఉండటంతో ఎప్పుడు ఏ ప్రమాదం సంభవిస్తుందోనని స్థానికులు ఆందోళన వ్యక్తం చేస్తున్నారు. మరోవైపు వీధి దీపాలు రాత్రంతా వెలగడమే కాకుండా పగటి వేళల్లోనూ ఆరిపోకుండా ఉండటం విద్యుత్ వృథాకు నిదర్శనంగా నిలుస్తోంది.
వీధి దీపాల నిర్వహణకు ప్రత్యేక వ్యవస్థలు ఉన్నప్పటికీ వాటి పనితీరుపై నిరంతర పర్యవేక్షణ లేకపోవడంతో ఈ పరిస్థితి నెలకొంటోందన్న అభిప్రాయాలు వ్యక్తమవుతున్నాయి. టైమర్ వ్యవస్థలు, ఆటోమేటిక్ స్విచ్లను సక్రమంగా నిర్వహిస్తే పగటిపూట దీపాలు వెలిగే సమస్యకు అడ్డుకట్ట వేయవచ్చు.
విద్యుత్ స్తంభాలపై అస్తవ్యస్తంగా ఉన్న తీగలను క్రమబద్ధీకరించి ప్రమాదకర పరిస్థితులను నివారించాల్సిన బాధ్యత కూడా సంబంధిత శాఖలపై ఉంది. ప్రజాధనం వెచ్చించి విద్యుత్ సదుపాయాలు కల్పిస్తున్నప్పటికీ వాటి నిర్వహణలో నిర్లక్ష్యం చోటుచేసుకుంటే ప్రయోజనం ఏమిటన్న ప్రశ్నలు తలెత్తుతున్నాయి.
విద్యుత్ ఆదా చేయాల్సిన వ్యవస్థే నిర్లక్ష్యానికి నిలువుటద్దంగా మారితే ఇక పొదుపు సందేశాలకు అర్థమేముంటుందనే విమర్శలు వస్తున్నాయి. ఇప్పటికైనా విద్యుత్ శాఖ, మున్సిపల్ అధికారులు సమన్వయంతో క్షేత్రస్థాయిలో తనిఖీలు చేపట్టి అస్తవ్యస్త తీగలను సరిచేయడంతో పాటు పగటిపూట వెలుగుతున్న వీధి దీపాలకు అడ్డుకట్ట వేయాలని ప్రజలు కోరుతున్నారు.