1. ఒడిశా సీఎంతో భట్టి విక్రమార్క భేటీ
2. బొగ్గు తవ్వకానికి సహకరించాలని వినతి
3. పూర్తిగా సహకరిస్తామన్న ఒడిశా సీఎం 

హైదరాబాద్, జూలై 12 (విజయక్రాంతి): నైనీ గని సమస్య పరిష్కారానికి కీలక ముందడుగు పడింది. రాష్ట్ర ప్రభుత్వ చొరవతో నైనీ బ్లాక్ నుంచి మరో రెండు, మూడు నెలల్లోనే బొగ్గు ఉత్పత్తిని ప్రారంభించే అవకాశం ఉంది. కొంతకాలంగా పెండింగ్‌లో ఉన్న నైనీ బ్లాక్‌లో ఉత్పత్తిపై ఒడిశా సీఎం మోహన్‌చరణ్ మాజీ సానుకూలంగా స్పందించారు. గనిలో బొగ్గు వెలికితీతకు తెలంగాణకు సహకరిస్తామని, అందుకు సంబంధించిన చర్యలు తీసుకోవాలని అధికారులను మోహన్‌చరణ్ ఆదేశించారు.

నైనీలో బొగ్గు తవ్వకాలు చేపట్టేందుకు సహకరించాలని డిప్యూటీ సీఎం భట్టి విక్రమార్క కోరగా ఒడిశా సీఎం సానుకూలంగా స్పం దించారు. 2015లో ఒడిశాలోని అంగుల్ జిల్లాలో గల నైనీ బొగ్గు బ్లాక్‌ను సింగరేణికి కేటాయించిన విషయం తెలిసిందే. అయితే కొన్ని సాంకేతిక సమస్యల కారణంగా ఆ గనుల్లో తవ్వకాలను ఇప్పటివరకు చేపట్టలేదు. ఈ క్రమంలో బొగ్గు ఉత్పత్తిని ప్రారం భించేందుకు ఎలాంటి అడ్డంకులు లేకుండా చూడాలని కోరేందుకు డిప్యూటీ సీఎం భట్టి ఆధ్వర్యంలో రాష్ట్ర బృందం శుక్రవారం ఒడిశాకు వెళ్లి ఆ రాష్ట్ర సీఎం మాజీని కలిశారు. సింగరేణి, తెలంగాణకు నైనీ బొగ్గు బ్లాక్ ఆవశ్యకతను వివరించారు. 2015లో ఈ బ్లాక్‌ను సింగరేణికి కేటాయించారని, బొగ్గు తవ్వేందుకు పర్యావరణ అనుమతులు కూడా వచ్చినట్లు చెప్పారు.

కోల్ వెలికితీతకు అనుమతులు ఇవ్వాలని గతంలో కేంద్రానికి అందజేసిన లేఖలను చూపెట్టారు. ఈ బ్లాక్‌లో తొవ్వకాలు ప్రారంభమైతే ఒడిశాకు ప్రయోజనం చేకూరుతుందని మాజీకి భట్టి వివరించారు. స్థానిక యువతకు ఉద్యోగాలు వస్తాయని, పన్నులు రూపంలో రూ.600 కోట్ల వరకు ఆదాయం వస్తుందని చెప్పారు. ఈ మేరకు ఒడిశా సీఎంకు భట్టి వినతిపత్రం అందజేశారు. ఈ మేరకు స్పందించిన మాజీ.. గనికి చెందిన భూములు, విద్యుత్, రోడ్లు, మౌలిక వసతుల కల్పనకు సంబంధించిన సమస్యలను వెంటనే పరిష్కరిం చాలని అధికారులను ఆదేశించారు. నిర్వాసితుల సమస్యపై కూడా దృష్టి సారించాలని సూచించారు.

కీలక ఐదు అంశాలు 

1. * బొగ్గు గని స్టేజ్ అనుమతుల్లో భాగం గా 783.27హెక్టార్ల అటవీ భూమిని సింగరేణి సంస్థకు ఒడిశా సర్కారు కేటాయిం చింది. అయితే ఆ భూమిలోని చెట్ల ను తొలగించిన తర్వాతే.. ఆ ల్యాండ్‌ను సింగరేణికి బదలాయించాలి. కానీ ఆ రాష్ట్ర అటవీ శాఖ ఇంతవరకు చెట్లను తొలగించలేదు. వెంటనే చెట్లను తొలగించాలని తాజాగా సీఎం ఆదేశించారు.
2. * నైనీ బ్లాక్‌కు ఒక గ్రామాన్ని తరలించాల్సి ఉంటుంది. అయితే ఆ గ్రామస్థులకు చెల్లించాల్సిన ఆర్ అండ్ ఆర్ తదితర అం శాలపై చర్చించడానికి జిల్లా కలెక్టర్ ఆధ్వర్యంలో రిహాబిలిటేషన్ కమిటీ స మావే శం జరగాల్సి ఉంది. అది ఇంతవరకు జరగలేదు. దీంతో సమావేశాన్ని వెం టనే నిర్వహించాలని సీఎం ఆదేశించారు.
3. * నైనీ బ్లాక్‌కు మొత్తం 912.79హెక్టార్ల భూమి అవసరమైనప్పటికీ, ఇందులో ప్రభుత్వం భూమి 17.69 హెక్టార్లు ఉంది. ఈ భూమిని వెంటనే బదలాయించాలని ఒడిశా సీఎంను భట్టి కోరారు.
4. * నైనీ బ్లాక్ నుంచి ఉత్పత్తి అయ్యే బొగ్గును అతి సమీపంలో ఉన్న జరపడ అనే రైల్వే సైడరింగ్ ద్వారా రవాణా చేయాలని సిం గరేణి సంస్థ నిర్ణయించింది. దీనికి సం బంధించి రవాణా కాంట్రాక్టు కూడా సిద్ధం చేసింది. అయితే ఇందుకోసం చండీపడ గ్రామం నుంచి జరపడ వరకు ఉన్న ఆర్‌అండ్‌బీ రోడ్డును విస్తరించాల్సి ఉంది. వెంటనే ఆ రోడ్డు విస్తరించాలని భట్టి కోరగా మాజీ సానుకూలంగా స్పందించారు.
5. * నైనీ బ్లాక్ నుంచి బొగ్గు ఉత్పత్తి జరగాలంటే హై టెన్షన్ విద్యుత్ కావాలి. జరపడ నుంచి చెండిపాడు వరకు హైటెన్షన్ లైన్ సౌకర్యం కల్పించాల్సి ఉంది. ఇందుకోసం సింగరేణి 2022లో రూ. 9.25 కోట్లను డిపాజిట్ చేసింది. ఈ పనులను వెంటనే పూర్తి చేయాలని ఒడి శా సీఎం అధికారులను ఆదేశించారు.

నైనీ బ్లాక్ సందర్శన

ఒడిశా సీఎం మోహన్‌చరణ్‌తో సమావేశం అనంతరం భువనేశ్వర్‌కు 140 కిలోమీటర్ల దూరంలోని నైనీ బొగ్గు గనుల ప్రాంతాన్ని భట్టి సందర్శించారు. తొలుత భట్టికి చెండిపడ ఎమ్మెల్యే అగస్తి బెహరా స్వాగతం పలికారు. అనంతరం స్థానిక ఎమ్మె ల్యే, అధికారులు, నిర్వాసితులతో కలిసి డిప్యూటీ సీఎం భట్టి గని ప్రాంతాన్ని కలియతిరిగారు. భట్టి వెంట తెలంగాణ ఇంధన శాఖ కార్యదర్శి రొనాల్డ్ రోస్, సింగరేణి  సీఎండీ ఎన్ బలరామ్ ఉన్నారు. ఈ సందర్భంగా గనికి సంబంధించిన రోడ్డు రవాణా, తదితర సౌకర్యాల గురించి అధికారులను అడిగి తెలుసుకున్నారు. నైనీ బ్లాక్ నుంచి ఏడాది దాదాపు కోటి టన్నుల బొగ్గును ఉత్పత్తి చేయొచ్చని డిప్యూటీ సీఎంకు అధికారులు వివరించారు.