ఇజ్రాయెల్‌కు విమాన సర్వీసులపై ఎయిర్ ఇండియా కీలక ప్రకటన

జెరూసలేం: పశ్చిమ ఆసియాలో కొనసాగుతున్న భౌగోళిక రాజకీయ అనిశ్చితుల నడుమ, టెల్ అవీవ్-ఢిల్లీ మార్గంలో తన విమాన సేవలను జూలై నెలాఖరు వరకు నిలిపివేస్తున్నట్లు ఎయిర్ ఇండియా గురువారం తెలిపింది. ఈ నెల ఆరంభంలో, జూన్ నెలాఖరు వరకు సేవలను నిలిపివేస్తున్నట్లు ప్రకటించినప్పటికీ ఆ ప్రాంతంలో నెలకొన్న భద్రతా పరిస్థితులపై స్పష్టత లేకపోవడంతో ఈ ప్రముఖ భారతీయ విమానయాన సంస్థ, ఈ మార్గంలో తన కార్యకలాపాల నిలిపివేతను మరో నెల రోజుల పాటు పొడిగించాలని నిర్ణయించింది.  ఫిబ్రవరి చివరలో ప్రారంభమైన పశ్చిమ ఆసియా సంఘర్షణ నేపథ్యంలో విమానయాన సంస్థలు ఇంధన ధరల పెరుగుదల, గగనతల ఆంక్షలతో సహా పలు ప్రతికూలతలను ఎదుర్కొంటున్నాయి.

అమెరికా, ఇరాన్‌ల మధ్య కాల్పుల విరమణ కొంతకాలం పాటు కొనసాగినప్పటికీ, పశ్చిమ ఆసియా పరిస్థితులను చుట్టుముట్టిన అనిశ్చితుల కారణంగా, అత్యధిక విమానయాన సంస్థలు టెల్ అవీవ్ మార్గంలో తమ సేవలను నిలిపివేశాయి. ఎల్ అల్, ఇస్రాఎయిర్, ఆర్కియా, ఎయిర్ హైఫా వంటి ఇజ్రాయెల్ విమానయాన సంస్థలతో పాటు, మరికొన్ని అంతర్జాతీయ విమానయాన సంస్థలు మాత్రమే తమ కార్యకలాపాలను పునఃప్రారంభించాయి. వ్యక్తిగత లేదా వృత్తిపరమైన కారణాల రీత్యా, లేదా ఆ ప్రాంతంలోని అనిశ్చితుల నుండి తప్పించుకునే ఉద్దేశంతో భారతదేశానికి ప్రయాణించాలనుకుంటున్న, ఇజ్రాయెల్‌లో నివసిస్తున్న 40,000 మందికి పైగా భారతీయులలో ఎయిర్ ఇండియా విమానాల నిలిపివేత తీవ్ర ఆందోళనలకు కారణమైంది.