ఆ నాలుగు భాషల్లో అలప్పుళ జింఖానా

స్పోర్ట్స్, కామెడీ, డ్రామా వంటి అంశాలతో రూపుదిద్దుకున్న మలయాళ చిత్రం ‘అలప్పుళ జింఖానా’. ఖలీద్ రెహ్మాన్ దర్శకత్వం వహించడమే కాక జాబిన్ జార్జ్, సమీర్ కరాట్, సుబీష్ కన్నంచేరితో కలిసి ఈ చిత్రాన్ని నిర్మించారు. నస్లెన్, లుక్‌మాన్ అవరాన్, గణపతి ఎస్ పొడువాల్, సందీప్ ప్రదీప్, అనఘా రవి, ఫ్రాంకో ఫ్రాన్సిస్, బేబీ జీన్, శివ హరిహరన్ తదితరులు నటించారు.

కథలోని చక్కటి కామెడీని, గందరగోళాన్ని బ్యాలెన్స్ చేస్తూ తెరకెక్కించిన ఈ చిత్రం థియేటర్లలో విడుదలై ప్రేక్షకుల మెప్పు పొందింది. ఇప్పుడీ సినిమా ఓటీటీ వేదికగా మరో నాలుగు భాషల్లో ప్రేక్షకులను అలరించటానికి సిద్ధమైంది. ఓటీటీ మాధ్యమం సోనీ లివ్‌లో జూన్13 నుంచి తెలుగు, తమిళ, కన్నడ, హిందీ భాషల్లో స్ట్రీమింగ్ కానుంది.

ఈ సందర్భంగా నస్లెన్ మాట్లాడుతూ.. “అలప్పుళ జింఖానా’లో నేను జోజో పాత్రలో నటించటం మంచి అనుభూతినిచ్చింది. ఈ పాత్రలో నటించటం ద్వారా నాలోని బలహీనతలు, బలాలను తెలుసుకోగలిగాను. ఈ ప్రాజెక్ట్‌లో భాగం కావటం చాలా సంతోషంగా ఉంది” అన్నారు.