హైదరాబాద్: గద్దర్ తెలంగాణ ఫిల్మ్ అవార్డుపై( Gaddar Telangana Film Award) ప్రముఖ సినీనటుడు అల్లు అర్జున్ స్పందించారు. ఉత్తమ నటుడిగా ఎంపిక కావడం గౌరవంగా భావిస్తున్నానని తెలిపారు. తెలంగాణ ప్రభుత్వానికి అల్లు అర్జున్(Allu Arjun) హృదయపూర్వక ధన్యవాదాలు చెప్పారు. అవార్డు ఘనత సుకుమార్, నిర్మాతలు, పుష్ప బృందానికే దక్కుతుందని పేర్కొన్నారు. గద్దర్ తెలంగాణ ఫిల్మ్ అవార్డు అభిమానులకు అంకితం చేస్తున్నట్లు అల్లు అర్జున్ ప్రకటించారు.

తెలంగాణ ప్రభుత్వం గురువారం గద్దర్ ఫిల్మ్ అవార్డులను ప్రకటించింది. బ్లాక్ బస్టర్ మూవీ ‘పుష్ప-2’ చిత్రానికి అల్లు అర్జున్ ఉత్తమ నటుడి అవార్డును గెలుచుకోగా, ‘చిన్న కథ కాదు’ చిత్రానికి నివేదా థామస్ ఉత్తమ సినీ నటి అవార్డును గెలుచుకుంది. 1,248 నామినేషన్లను పరిశీలించిన తర్వాతే 11 విభాగాలలో అవార్డులను ప్రకటించారు. జూన్ 2014 నుండి డిసెంబర్ 31, 2023 వరకు విడుదలైన సినిమాలను ఉత్తమ సినిమా కేటగిరీకి పరిగణనలోకి తీసుకున్నారు.

అయితే, 2024 సంవత్సరానికి సంబంధించిన అన్ని విభాగాలకు అవార్డులు అందజేశారు. జూన్ 14న అవార్డులు ప్రదానం చేస్తారు. ప్రభాస్(Prabhas) నటించిన ‘కల్కి’(Kalki 2898 AD) ఉత్తమ చిత్రంగా, ‘పోట్టెల్’, ‘లక్కీ భాస్కర్’ చిత్రాలు వరుసగా రెండవ, మూడవ ఉత్తమ చిత్రాల అవార్డులను గెలుచుకున్నాయి. ‘కల్కి’ చిత్రానికి నాగ్ అశ్విన్ సింగి రెడ్డి ఉత్తమ చిత్ర దర్శకుడిగా అవార్డును అందుకున్నారు. ‘రజాకార్’ చిత్రానికి భీమ్స్ సిసిరోలియో ఉత్తమ సంగీత దర్శకుడిగా అవార్డును అందుకున్నారు. ఇది చరిత్ర, వారసత్వం, పర్యావరణ విభాగంలో ఉత్తమ చలనచిత్ర అవార్డును కూడా గెలుచుకుంది. ఈ అవార్డులను గద్దర్ తెలంగాణ ఫిల్మ్ అవార్డ్స్ జ్యూరీ చైర్‌పర్సన్, ప్రముఖ నటి జయసుధ(Jayasudha) ప్రకటించారు. ‘ఊరు పేరు భైరవకోన’ చిత్రానికి సిద్ శ్రీరామ్ ఉత్తమ నేపథ్య గాయకుడిగా అవార్డును, ‘పుష్ప-2’ చిత్రానికి శ్రేయ ఘోషల్ ఉత్తమ మహిళా నేపథ్య గాయనిగా అవార్డును అందుకున్నారు. ‘మత్తు వడలారా’ చిత్రానికి వెన్నల కిషోర్, సత్య ఉత్తమ హాస్యనటుడు అవార్డును గెలుచుకున్నారు.