కోరాపుట్: ఒడిశాలోని కోరాపుట్ జిల్లాలోని(Koraput District) బోయిపారిగూడ ప్రాంతంలోని అడవిలో సోదాలు నిర్వహిస్తున్న సమయంలో కరుడుగట్టిన మావోయిస్టు కుంజమ్ హిడ్మాను(Maoist leader Kunjam Hidma) అరెస్టు చేసినట్లు ఒడిశా పోలీసులు గురువారం తెలిపారు. ఛత్తీస్‌గఢ్‌లోని బీజాపూర్ జిల్లాకు చెందిన కుంజమ్ హిడ్మా అలియాస్ మోహన్ నిషేధిత సీపీఐ (Maoist) కేడర్‌లో ఏరియా కమిటీ సభ్యుడు. అతను 2020 -2023 మధ్య 4 ప్రధాన మావోయిస్టు సంఘటనలలో పాల్గొన్నాడు. మావోయిస్టు హిడ్మాను ఏకే-47 రైఫిల్‌తో సహా ఆయుధాలు, మందుగుండు సామగ్రితో పట్టుకున్నారు.

బోయిపారిగూడ పోలీసు పరిధిలోని(Boipariguda Police Area) పెట్‌గూడ గ్రామ సమీపంలోని అటవీ ప్రాంతంలో మావోయిస్టు కార్యకర్తల గుంపు కదలికపై అందిన సమాచారం మేరకు, కోరాపుట్ జిల్లా పోలీసులు మే 28 రాత్రి మావోయిస్టులను పట్టుకోవడానికి ప్రత్యేక ఆపరేషన్ ప్రారంభించారు. ఈ ఆపరేషన్ కింద, జైపూర్ ఎస్డీపీఓ(SDPO) పార్థ్ కశ్యప్, డీఐఓసీ(DIOC) అసిస్టెంట్ కమాండెంట్ దిబ్యా ప్రసాద్ పరిదా నేతృత్వంలోని జిల్లా స్వచ్ఛంద దళం (District Volunteer Force) గురువారం తెల్లవారుజామున అడవిలోని ఒక కొండ వద్ద మావోయిస్టు శిబిరాన్ని కనుగొంది. శిబిరాన్ని చుట్టుముట్టడానికి బృందం ముందుకు సాగుతుండగా, మావోయిస్టులు పోలీసు(Odisha Police) సిబ్బందిపై కాల్పులు జరిపి అటవీ ప్రాంతంలోకి పారిపోయారు. తర్వాత జరిగిన సోదాల్లో, మావోయిస్టు కుంజమ్ హిడ్మా సమీపంలోని పొదల్లో దాక్కునేందుకు ప్రయత్నిస్తుండగా పట్టుబడ్డాడు. అయితే, మరికొందరు మావోయిస్టులు పారిపోయినట్లు పోలీసులు వెల్లడించారు.