అమరావతి: జమ్మూ కాశ్మీర్‌లోని నియంత్రణ రేఖ (Line of Control) వెంబడి భారతదేశం- పాకిస్తాన్ మధ్య జరిగిన కాల్పుల్లో ఆంధ్రప్రదేశ్‌కు చెందిన ఒక భారత ఆర్మీ జవాన్ మురళీ నాయక్ వీరమరణం పొందాడు. అమరవీరుడు మురళీ నాయక్( Indian Army soldier Murali Nayak)కు ఏపీ ముఖ్యమంత్రి చంద్రబాబు నాయుడు నివాళులర్పించారు. "దేశ రక్షణలో శ్రీ సత్యసాయి జిల్లా పెనుకొండ శాసనసభ నియోజకవర్గం గోరంట్ల మండలానికి చెందిన మురళి నాయక్ అనే సైనికుడు ప్రాణాలు కోల్పోవడం విషాదకరం. దేశం కోసం ప్రాణాలర్పించిన అమరవీరుడు మురళి నాయక్ కు నివాళులు. ఆయన కుటుంబ సభ్యులకు ప్రగాఢ సానుభూతిని తెలియజేస్తున్నాను." అంటూ ఏపీ సీఎం(AP Chief Minister Chandrababu Naidu) ఎక్స్ లో పోస్టు చేశారు.

వివరాల ప్రకారం, భారత ఆర్మీ సైనికుడు(Indian Army Soldier) మురళీ నాయక్ తన దేశం కోసం పోరాడుతూ ప్రాణాలు కోల్పోయాడు. అతను ఆంధ్రప్రదేశ్‌లోని శ్రీ సత్యసాయి జిల్లాలోని గడ్డంతండ పంచాయతీ పరిధిలోని కల్లితండ గ్రామానికి చెందినవాడు. మురళీ నాయక్ మృతదేహం రేపటి నాటికి తన స్వగ్రామానికి చేరుకుంటుందని భావిస్తున్నారు. మురళీ నాయక్ సోమందేపల్లిలో చదువుకున్నాడు. భారత సాయుధ దళాలలో పనిచేయడానికి ఎంచుకున్న తన ప్రాంతానికి చెందిన యువకులలో ఒకడు. తమ ప్రాంతానికి చెందిన మరికొందరు యువకులు కూడా భారత సైన్యంలో పనిచేస్తున్నారని గ్రామ సర్పంచ్ పేర్కొన్నారు. మొత్తం దేశం మురళీ నాయక్ ధైర్యసాహసాలకు సెల్యూట్ చేస్తోంది. దేశం కోసం ప్రాణాలర్పించిన అమరవీరుడు మురళి నాయక్  కు పలువురు నివాళులర్పించారు. దేశం మొత్తం ఆయన కుటుంబ సభ్యులకు ప్రగాఢ సానుభూతిని తెలియజేస్తోంది. భారత సైన్యం(Indian Army)లో అంకితభావంతో పనిచేసే సైనికుడు మురళీ నాయక్ వీరమరణం వార్తతో దేశం మొత్తం దుఃఖంలో మునిగిపోయింది.