ఆర్బీఐ కేంద్ర బోర్డులో అనధికార డైరెక్టర్‎గా సయ్యద్ నియామకం

గీతం యాజమాన్యం, కౌటిల్యా అధ్యాపకుల హర్షం

పటాన్ చెరు, ఆగస్టు 25(విజయక్రాంతి): హైదరాబాద్‌లోని గీతం డీమ్డ్ విశ్వవిద్యాలయం కౌటిల్యా స్కూల్ ఆఫ్ పబ్లిక్ పాలసీ డీన్, ఐక్యరాజ్య సమితిలో భారత మాజీ శాశ్వత ప్రతినిధి సయ్యద్ అక్బరుద్దీన్‌ను రిజర్వ్ బ్యాంక్ ఆఫ్ ఇండియా (ఆర్బీఐ) కేంద్ర బోర్డులో పార్ట్‌టైమ్, అధికారేతర డైరెక్టర్‌గా నియమించారు. నాలుగేళ్ల కాలపరిమితితో ఆయన నియామకం తక్షణమే అమల్లోకి వచ్చింది. భారత ప్రభుత్వ క్యాబినెట్ నియామకాల కమిటీ సచివాలయం, సిబ్బంది, ప్రజా ఫిర్యాదులు, పెన్షన్ల మంత్రిత్వ శాఖ పరిధిలోని సిబ్బంది, శిక్షణ విభాగం (డీఓపీటీ) అండర్ సెక్రటరీ (ఈవో-ఎస్ఎం-II) కుందన్ నాథ్ ఈ నియామకానికి సంబంధించిన ఉత్తర్వులు జారీ చేశారు. సయ్యద్ అక్బరుద్దీన్‌తో పాటు యానీ జార్జ్ మాథ్యూ, జనమేజయ కుమార్ సిన్హాలను కూడా ఆర్బీఐ కేంద్ర బోర్డులో పార్ట్‌టైమ్, అధికారేతర డైరెక్టర్లుగా నియమించారు.

అక్బరుద్దీన్ నియామకం పట్ల గీతం నాయకత్వం, కౌటిల్యా స్కూల్ ఆఫ్ పబ్లిక్ పాలసీ అధ్యాపకులు, సిబ్బంది హర్షం వ్యక్తం చేశారు. ఆయనకు కొత్త బాధ్యతలపై అభినందనలు తెలియజేస్తూ, భవిష్యత్తులో మరిన్ని విజయాలు సాధించాలని ఆకాంక్షించారు.

మూడు దశాబ్దాలకు పైగా దౌత్య అనుభవం

సయ్యద్ అక్బరుద్దీన్ మూడు దశాబ్దాలకు పైగా వృత్తి జీవితాన్ని కొనసాగించిన 1985 బ్యాచ్ ఇండియన్ ఫారిన్ సర్వీస్ (ఐఎఫ్‌ఎస్)కు చెందిన విశిష్ట భారతీయ దౌత్యవేత్త. జనవరి 2016 నుంచి ఏప్రిల్ 2020 వరకు న్యూయార్క్‌లోని ఐక్యరాజ్య సమితిలో భారతదేశ శాశ్వత ప్రతినిధిగా పనిచేశారు. అంతకు ముందు, జనవరి 2012 నుంచి ఏప్రిల్ 2015 వరకు విదేశీ వ్యవహారాల మంత్రిత్వ శాఖ అధికార ప్రతినిధిగా వ్యవహరించారు. అలాగే, 2006 నుంచి 2011 వరకు వియన్నాలోని అంతర్జాతీయ అణుశక్తి సంస్థ (ఐఏఈఏ)లో విదేశీ సంబంధాలు, విధాన సమన్వయ విభాగాధిపతిగా పనిచేశారు.

తన దౌత్య వృత్తిలో అక్బరుద్దీన్ స్వదేశంలోనూ, విదేశాల్లోనూ అనేక కీలక బాధ్యతలు నిర్వహించారు. కైరో, రియాద్, జెడ్డా నగరాల్లో పనిచేయడం ద్వారా పశ్చిమాసియా వ్యవహారాలపై గణనీయమైన నైపుణ్యాన్ని సంపాదించారు. విదేశీ వ్యవహారాల మంత్రిత్వ శాఖ కార్యదర్శి కార్యాలయంలో డైరెక్టర్‌గా పనిచేయడంతో పాటు, మంత్రిత్వ శాఖలో బాహ్య ప్రచారం, ప్రజా దౌత్య విభాగానికి నాయకత్వం వహించారు. 2015లో జరిగిన భారత్-ఆఫ్రికా శిఖరాగ్ర సమావేశానికి ఆయన ముఖ్య సమన్వయకర్తగా వ్యవహరించారు.

ఐక్యరాజ్య సమితిలో కీలక పాత్ర

ఐక్యరాజ్య సమితిలో భారతదేశ శాశ్వత ప్రతినిధిగా పనిచేసిన సమయంలో అక్బరుద్దీన్ బహుపాక్షిక వేదికలపై భారతదేశ ప్రయోజనాలను ముందుకు తీసుకెళ్లడంలో ప్రముఖ పాత్ర పోషించారు. ఆయన సమర్థవంతమైన దౌత్య కృషికి విస్తృతంగా గుర్తింపు లభించింది. ఆయన పదవీకాలంలో ఉగ్రవాద నిరోధం, వాతావరణ మార్పు, సుస్థిర అభివృద్ధి, అంతర్జాతీయ శాంతి, భద్రత వంటి అంశాల్లో గణనీయమైన కృషి చేశారు.

ప్రజా విధాన విద్యలోనూ సేవలు

గీతం డీమ్డ్ విశ్వవిద్యాలయంలోని కౌటిల్యా స్కూల్ ఆఫ్ పబ్లిక్ పాలసీ డీన్‌గా అక్బరుద్దీన్ ప్రజా విధాన విద్యాభివృద్ధికి, భారతదేశంలోనే కాకుండా అంతర్జాతీయ స్థాయిలోనూ భవిష్యత్ నాయకులను తీర్చిదిద్దేందుకు తనవంతు కృషిని కొనసాగిస్తున్నారు.