జమ్మూ: జమ్మూ కాశ్మీర్‌లోని కిష్త్వార్ జిల్లా ఎగువ ప్రాంతాలలో దాక్కున్నారని భావిస్తున్న ఉగ్రవాదులను(Terrorists) పట్టుకోవడానికి భద్రతా బలగాలు సోమవారం తమ గాలింపు చర్యలను తిరిగి ప్రారంభించాయని అధికారులు తెలిపారు. ఈ ఆపరేషన్ ఆదివారం చత్రూ ప్రాంతంలోని మాండ్రల్-సింగ్‌పోరా సమీపంలోని సోన్నార్ గ్రామంలో ప్రారంభమైంది. అటవీ ప్రాంతంలో అనుమానిత ఉగ్రవాదులతో జరిగిన సుదీర్ఘ కాల్పుల్లో ఎనిమిది మంది భారత ఆర్మీ సైనికులు ఆదివారం గాయపడ్డారు.  ఈ కాల్పుల్లో దాక్కున్న ఉగ్రవాదులు ఆకస్మికంగా గ్రెనేడ్ దాడి చేయడంతో, దాని శకలాలు తగిలి సైనికులు గాయపడ్డారు.

ఉగ్రవాదులు తప్పించుకోకుండా ఉండేందుకు, సైన్యం, పోలీసులు, పారామిలిటరీ బలగాలకు చెందిన బహుళ బృందాలు డ్రోన్లు, స్నిఫర్ కుక్కల సహాయంతో గట్టి భద్రతా వలయాన్ని ఏర్పాటు చేసి ఆ ప్రాంతంలో గాలింపు చర్యలు చేపడుతున్నాయని అధికారులు తెలిపారు. పాకిస్థాన్‌కు చెందిన జైష్-ఎ-మొహమ్మద్ (జేఈఎం) సంస్థతో సంబంధం ఉన్న ఇద్దరు, ముగ్గురు ఉగ్రవాదులు ఆ ప్రాంతంలో చిక్కుకున్నారని భావిస్తున్నట్లు అధికారులు తెలిపారు.  ఆపరేషన్ త్రాషి-I' అని పిలవబడే ఈ ఆపరేషన్‌లో, జమ్మూకు చెందిన ఆర్మీ వైట్ నైట్ కార్ప్స్ ఆదివారం ఎక్స్‌లో ఒక పోస్ట్‌లో, జమ్మూ కాశ్మీర్ పోలీసులతో కలిసి జరుగుతున్న సంయుక్త ఉగ్రవాద నిరోధక విన్యాసాలలో భాగంగా నిర్వహించిన గాలింపు చర్యల సమయంలో, చత్రూకు ఈశాన్యంగా ఉన్న సోనార్ ప్రాంతంలో భద్రతా బలగాలు ఉగ్రవాదులతో తారసపడ్డాయని తెలిపింది. "కార్డన్‌ను బలోపేతం చేయడానికి అదనపు బలగాలను రంగంలోకి దింపడంతో ఆపరేషన్లు కొనసాగుతున్నాయి. పౌర పరిపాలన, భద్రతా సంస్థలతో సన్నిహిత సమన్వయంతో మద్దతు ఇవ్వబడింది" అని సైన్యం తెలిపింది. 

ఈ ఏడాది జమ్మూ ప్రాంతంలో భద్రతా బలగాలకు, ఉగ్రవాదులకు మధ్య జరిగిన మూడవ ఘర్షణ ఇది. అంతకుముందు జనవరి 7-13 తేదీలలో కథువా జిల్లాలోని బిల్లవార్ ప్రాంతంలోని కహోగ్ ,నజోట్ అడవులలో గతంలో రెండు ఎన్‌కౌంటర్లు జరిగాయి. గత సంవత్సరం డిసెంబర్‌లో జమ్మూ ప్రాంతంలోని అటవీ ప్రాంతాలలో దాక్కున్న దాదాపు మూడు డజన్ల మంది ఉగ్రవాదులను ఏరివేసేందుకు ప్రారంభించిన ఒక పెద్ద ఉగ్రవాద వ్యతిరేక ఆపరేషన్ తర్వాత ఈ ఎన్‌కౌంటర్లు జరిగాయి. గణతంత్ర దినోత్సవం సందర్భంగా శాంతియుత వేడుకలను నిర్వహించడానికి ఆపరేషన్లను మరింత ముమ్మరం చేసినట్లు అధికారులు తెలిపారు. పాకిస్తాన్ కేంద్రంగా పనిచేస్తున్న ఉగ్రవాదులు ఈ ప్రాంతంలోకి మరింత మంది ఉగ్రవాదులను పంపించేందుకు తీవ్రంగా ప్రయత్నిస్తున్నారనే నిఘా వర్గాల సమాచారం ఈ సందర్భంగా వెల్లడైంది. అటు సరిహద్దుల్లో పాక్ డ్రోన్లు ఇటీవల కలకలం రేపిన విషయం తెలిసిందే. పాక్ సరిహద్దుల్లో ఎలాంటి కవ్వింపు చర్యలకు పాల్పడిన అందుకు ధీటుగా సమాధానం చెబుతామని భారత్ ఆర్మీ హెచ్చరించింది. ఆపరేషన్ సిందూర్ ఇంకా కొనసాగుతోందని ఇండియన్ ఆర్మీ చీఫ్ ఉపేంద్ర ద్వివేది స్పష్టం చేశారు.