రంగుల తాడు

ఎవరు పిలిచారో ?

మేఘాన్ని

ఉన్నపళంగా వెళ్లిపోయింది !

మనసులో మాటలు 

ఇంకా మిగిలే ఉన్నాయి

తనివి తీరని తలపులెన్నో

తలుపు చాటునే పొంచాయి 

కదలిపోతున్న మేఘాన్ని

కదలకుండా చూస్తూ 

నేలపై శిలలా

ఒంటరిగా నేను  !

నా గుండె శబ్దం 

ఏ విహంగానికి వినిపించిందో?

ముందుకెళ్లిన మేఘం 

క్షణాల్లో నా ముందుకొచ్చింది 

నన్నే చూస్తూ నిలుచుంది 

మనసు మురిసి 

మాటల ముడి విప్పి 

పూర్తిగా వినిపించా !

చినుకులు 

నా చిన్ననాటి స్నేహితులు

చిందులేయాలన్నది 

నా చిరకాల కోరిక 

ముద్దగా తడిసి 

మనసు ముసురంతా 

చెరిగిపోయింది 

జల్లులు కురిసి 

మేఘం కూడా తేటతెల్లమైంది 

ఆలస్యం చేయక 

రంగుల తాడు విసిరి 

చూపును కట్టేసింది హరివిల్లు