కులగణనతోనే బీసీల సమగ్ర అభివృద్ధి

రాష్ట్ర ప్రభుత్వ బీసీ సంక్షేమ ప్రత్యేక సలహాదారు వి. హనుమంతరావు

కామారెడ్డి, ఆగస్టు 15 (విజయక్రాంతి): కుల గణన తోనే బీసీలకు సమగ్ర అభివృద్ధి జరుగుతుందని రాష్ట్ర ప్రభుత్వ బీసీ సంక్షేమ అభివృద్ధి ప్రత్యేక సలహాదారు వి హనుమంతరావు అన్నారు. శనివారం కామారెడ్డి నియోజకవర్గ కాంగ్రెస్ పార్టీ కార్యాలయంలో విలేకరుల సమావేశంలో మాట్లాడారు.ఈ సందర్భంగా దేశ ప్రజలందరికీ 80వ స్వాతంత్ర్య దినోత్సవ శుభాకాంక్షలు తెలిపారు. స్వాతంత్య్ర సమరయోధుల త్యాగాలను స్మరించుకుంటూ, దేశంలో సామాజిక న్యాయం, సమానత్వం, ప్రజాస్వామ్య పరిరక్షణ కోసం కాంగ్రెస్ పార్టీ నిరంతరం పోరాడుతుందని అన్నారు.

బీసీలకు జనాభా ప్రాతిపదికన రిజర్వేషన్లు కల్పించాలన్నారు. దేశ జనాభాలో బీసీల వాటా గణనీయంగా ఉన్నప్పటికీ, వారి జనాభాకు అనుగుణంగా రాజకీయ, విద్యా, ఉద్యోగ రంగాల్లో తగిన ప్రాతినిధ్యం లభించడం లేదని వి. హనుమంతరావు అన్నారు. జనాభా ఎంత ఉంటే, ఆ మేరకు అవకాశాలు, ప్రాతినిధ్యం కల్పించాలన్నదే కాంగ్రెస్ పార్టీ డిమాండ్ అని స్పష్టం చేశారు.జనగణనతో పాటు సమగ్ర కులగణన నిర్వహించి, ప్రతి సామాజిక వర్గం జనాభా, సామాజిక-ఆర్థిక పరిస్థితులు, విద్య, ఉద్యోగాలు, ప్రభుత్వ పథకాల ప్రయోజనాలపై సమగ్ర సమాచారం సేకరించాలని కోరారు. కులగణన ఆధారంగా వెనుకబడిన వర్గాలకు ప్రత్యేక ప్రణాళికలు రూపొందించి న్యాయం చేయాల్సిన అవసరం ఉందన్నారు.

కేంద్రంపై హనుమంతరావు విమర్శలు

కేంద్ర ప్రభుత్వం చేపట్టబోయే జనగణనలో బీసీలకు సంబంధించిన సమగ్ర కుల వివరాలను ఎందుకు స్పష్టంగా పొందుపరచడం లేదని ఆయన ప్రశ్నించారు. దేశ జనాభాలో కీలక భాగమైన బీసీల సంఖ్య, వారి సామాజిక-ఆర్థిక స్థితిగతులు తెలియకుండా వారి అభివృద్ధికి సరైన విధానాలు ఎలా రూపొందిస్తారని ప్రశ్నించారు. “కులగణన లేకుండా బీసీలకు ఎంత న్యాయం జరుగుతుందో ఎలా నిర్ణయిస్తారు? బీసీల జనాభా లెక్కలు తేల్చకుండా వారికి సరైన వాటా ఎలా కల్పిస్తారు?” అని ఆయన కేంద్ర ప్రభుత్వాన్ని నిలదీశారు.

రాహుల్ గాంధీ బీసీల హక్కుల కోసం పోరాడుతున్నారు

కన్యాకుమారి నుంచి కాశ్మీర్ వరకు రాహుల్ గాంధీ చేపట్టిన భారత్ జోడో యాత్ర ద్వారా దేశ ప్రజలను ఐక్యం చేయడంతో పాటు సామాజిక న్యాయం, ప్రజల హక్కులు, రాజ్యాంగ పరిరక్షణ వంటి అంశాలను దేశవ్యాప్తంగా రాహుల్ గాంధీ ముందుకు తీసుకెళ్లారని హనుమంతరావు తెలిపారు.బీసీలకు జరుగుతున్న అన్యాయంపై రాహుల్ గాంధీ పార్లమెంట్‌లో నిరంతరం ప్రశ్నిస్తున్నారని, బీసీలకు జనాభా ప్రాతిపదికన న్యాయం చేయాలని డిమాండ్ చేస్తున్నారని చెప్పారు. పార్లమెంట్‌లో బీసీలకు న్యాయం చేసే విధంగా ప్రత్యేక చట్టపరమైన చర్యలు తీసుకోవాలని కేంద్రాన్ని కోరారు.

అంబేద్కర్ ఆశయాలే కాంగ్రెస్‌కు మార్గదర్శకం అని అన్నారు.డాక్టర్ బి.ఆర్. అంబేద్కర్ రూపొందించిన రాజ్యాంగం దేశంలోని ప్రతి పౌరుడికి సమాన హక్కులు కల్పించిందని, సామాజిక న్యాయం కోసం ఆయన చూపిన మార్గంలోనే కాంగ్రెస్ పార్టీ ముందుకు సాగుతోందని వి. హనుమంతరావు అన్నారు.ఎస్సీ, ఎస్టీ, బీసీ, మైనారిటీలు, మహిళలు, పేదలు, అణగారిన వర్గాలకు సమాన అవకాశాలు కల్పించడమే నిజమైన స్వాతంత్ర్యానికి అర్థమని పేర్కొన్నారు.బీసీల సమస్యలను పరిష్కరించాలన్నారు. బీసీలకు కేవలం ఎన్నికల సమయంలో హామీలు ఇవ్వడం కాకుండా, వారి జీవన ప్రమాణాలను మెరుగుపరిచే శాశ్వత విధానాలు అమలు చేయాలని హనుమంతరావు డిమాండ్ చేశారు.

బీసీ విద్యార్థులకు మెరుగైన విద్యా అవకాశాలు, ఉన్నత విద్యకు ఆర్థిక సహాయం, ఉద్యోగాల్లో తగిన ప్రాతినిధ్యం, స్వయం ఉపాధికి తక్కువ వడ్డీ రుణాలు, చిన్న వ్యాపారాలకు ఆర్థిక సహకారం, వృత్తిదారులకు ఆధునిక పరికరాలు, మార్కెటింగ్ సదుపాయాలు కల్పించాలని కోరారు. బీసీ యువతకు నైపుణ్య శిక్షణ, పోటీ పరీక్షల కోసం ప్రత్యేక కోచింగ్, మహిళలకు స్వయం ఉపాధి అవకాశాలు, వెనుకబడిన బీసీ కుటుంబాలకు గృహ, విద్య, ఆరోగ్య సదుపాయాలు కల్పించాల్సిన అవసరం ఉందన్నారు.బీసీలను ఓటు బ్యాంకుగా చూడొద్దు ఆన్నారు. బీసీలను కేవలం ఓటు బ్యాంకుగా ఉపయోగించుకోవడం కాకుండా, వారి అభివృద్ధికి స్పష్టమైన కార్యాచరణ రూపొందించాలి అని కేంద్రంలోని బీజేపీ ప్రభుత్వంపై హనుమంతరావు విమర్శలు చేశారు.

బీసీలకు రాజకీయంగా తగిన ప్రాతినిధ్యం, విద్యా-ఉద్యోగ రంగాల్లో అవకాశాలు, ఆర్థికంగా ఎదగడానికి అవసరమైన వనరులు కల్పించడంలో కేంద్ర ప్రభుత్వం చిత్తశుద్ధితో వ్యవహరించాలని అన్నారు.కులగణన కోసం ఉద్యమించాలన్నారు.స్వాతంత్ర్యం కోసం దేశ ప్రజలు ఏకమై పోరాడినట్టే, సామాజిక న్యాయం కోసం కులగణన సాధించే వరకు ప్రజాస్వామ్య పద్ధతిలో పోరాటం చేయాల్సిన అవసరం ఉందని హనుమంతరావు పిలుపునిచ్చారు.

కులగణనతోనే బీసీల వాస్తవ జనాభా తెలుస్తుందన్నారు. జనాభా ప్రాతిపదికన వాటా దక్కితేనే బీసీలకు సంపూర్ణ న్యాయం జరుగుతుందన్నారు. సామాజిక న్యాయం కోసం కాంగ్రెస్ పార్టీ నిరంతరం పోరాడుతుందన్నారు. ఈ కార్యక్రమంలో కాంగ్రెస్ పార్టీ పట్టణ అధ్యక్షులు ఐరేని సందీప్ కుమార్, జిల్లా గ్రంథాలయ సమస్త చైర్మన్ మద్ది చంద్రకాంత్ రెడ్డి , మున్సిపల్ చైర్ పర్సన్ ఇప్ప ఉమా రాణి శ్రీనివాస్ , పండ్ల రాజు, గోనె శ్రీనివాస్, కామారెడ్డి విండో చైర్మన్ గూడెం శ్రీనివాస్ రెడ్డి , ఎస్సీ సెల్ జిల్లా అధ్యక్షులు భూమని బాలరాజ్, సాయిలు, చాట్ల రాజేశ్వర్, కౌన్సిలర్లు నాయకులు, కార్యకర్తలు, స్థానికవి ప్రజాప్రతినిధులు, మీడియా ప్రతినిధులు తదితరులు పాల్గొన్నారు.