కేసీఆర్ లేకుంటే తెలంగాణ లేదు 

ఆయన గోడకు వేలాడదీసిన తుపాకీలాంటి వారు 

1. దమ్ముంటే ఆ ఎమ్మెల్యేలతో రాజీనామా చేయించాలి 
2. తల్లి తెలంగాణ విగ్రహాన్ని అక్కడ బరాబర్ పెడతాం 
3. కాంగ్రెస్ అరాచకాల నుంచి తెలంగాణను కాపాడుకుందాం 

దీక్షాదివస్ సందర్భంగా బీఆర్‌ఎస్ నేత కేటీఆర్

హైదరాబాద్, నవంబర్ 29 (విజయ క్రాంతి) : తెలంగాణ కథలో ముమ్మాటికి కాంగ్రెస్ విలన్ అని, కాంగ్రెస్ పార్టీనే తెలంగాణకు శాశ్వత శత్రువు అని బీఆర్‌ఎస్ వర్కింగ్ ప్రెసిడెంట్ కే తారకరామా రావు స్పష్టం చేశారు. తెలంగాణ బిడ్డల నెత్తురుతో కాంగ్రెస్ నేతల చేతులు తడిచాయన్నారు. కేసీఆర్ అనే మూడు అక్షరాలు లేకుంటే తెలంగాణ లేదు అన్నది సత్యమ ని పేర్కొన్నారు. పీసీసీ కాంగ్రెస్ అధ్యక్షుడు ఉద్యమకాలంలో ఎక్కడున్నారో ఎవరికి తెలియదని, ఆయన కూడా తెలంగాణ ఉద్యమం గురించి, కేసీఆర్ దీక్ష గురించి అడ్డగోలుగా మాట్లాడుతున్నారని మండిపడ్డారు.

కేంద్రం లో, రాష్ర్టంలో అప్పుడు అధికారంలో ఉన్న కాంగ్రెస్ పార్టీనే స్వ యంగా తెలంగాణ ఏర్పాటు ప్రకటన చేస్తూ.. కేసీఆర్ ప్రాణం ముఖ్యమైందని, దీక్ష విరమించాలని వేడుకున్న విషయాన్ని కేసీఆర్ చేసిన దీక్షను తక్కువ చేసి, అవమానకరంగా మాట్లాడుతున్న కాంగ్రెస్ నేతలు గుర్తు చేసుకోవాలని హితవు పలికారు. దీక్షా దివస్ సందర్భంగా శనివారం తెలంగాణ భవన్‌లో ఏర్పాటు చేసిన కార్యక్రమంలో కేటీఆర్ పాల్గొని మా ట్లాడారు.

హీరోలు మౌనంగా ఉంటే విలన్లు కూడా మేమే హీరోలని ఫోజులు కొడతారని, అందుకే ఉద్యమంలో భాగస్వాములైన ప్రతి ఒక్కరూ ఆనాటి ఉద్యమ ఘట్టాలను, దీక్షా దివాస్ ప్రాధాన్యతను మరోసారి ప్రజలకు తెలియజేయాల్సిన అవసరం ఉంద న్నారు. తెలంగాణ ఏర్పాటు తర్వాత సోని యా గాంధీకి ధన్యవాదాలు చెప్పిన సంస్కా రం తమదని, ముఖ్యమంత్రి రేవంత్ రెడ్డి మాదిరి ఏనాడు తెలంగాణ బలిదేవత సోనియా గాంధీ అని తాము అనలేదని గుర్తు చేశారు.

మమ్మల్ని అవమానపరిస్తే ఊరుకుంటాం.. కానీ తెలంగాణను, తెలంగాణ ఉద్యమాన్ని అవమానపరిస్తే ఊరుకు నేది లేదని హెచ్చరించారు. దమ్ముంటే చేర్చుకున్న పది మంది ఎమ్మెల్యేలతో రాజీనామా చేయించి ఎన్నికలకు రావాలని కేటీఆర్ సవాల్ విసిరారు.

కేసీఆర్ మాట, మౌనం రెండు సంచలనమే అని, రెండు సంవత్సరాలుగా తెలంగాణలో కేసీఆర్ మాట లేకుండా రాజకీయం నడవడం లేదని, అంతటి బలమైన ముద్ర కేసీఆర్‌ది అన్నారు. కేసీఆర్ ఏడాదిన్నరగా బయటకు రావట్లేదని అంటున్నారని.. గోడకు వేలాడదీసిన తుపాకీ కూడా సైలెంట్ గానే ఉంటుందని, కానీ బయటకు వచ్చినప్పుడు ఎలా పేలుతుందో తెలుసు అంటూ వ్యాఖ్యానించారు. 

బరాబర్ పెడతాం..

తెలంగాణ ప్రజలు ఉద్యమాల కోసం, ప్రజల కోసం నిలబడిన వీరులని, 60 ఏళ్ల పాటు బానిసలుగా ఉన్నది కాంగ్రెస్ పార్టీ నాయకులేనని స్పష్టం చేశారు. తల్లి తెలంగాణను తీసివేసి కాంగ్రెస్ బొమ్మను పెట్టుకు న్నది కాంగ్రెస్ బానిసలే అని, సచివాలయం ముందున్న రాజీవ్ గాంధీ విగ్రహాన్ని తీసి తల్లి తెలంగాణ విగ్రహం బరాబర్ పెడతాము అని కేటీఆర్ ప్రకటించారు.

ఈ దీక్షా దివాస్ సందర్భంగా తెలంగాణ ఉద్యమాన్ని, అమరవీరుల త్యాగాలను, ప్రజల పోరాటపటిమను గుర్తుచేసుకొని మరోసారి పునరంకి తం కావాల్సిన అవసరం ఉన్నదని, దీంతోపాటు కాంగ్రెస్ పార్టీ తెలంగాణకు చేసిన ద్రోహాన్ని, అమరుల ప్రాణాలు తీసుకున్న తీరుని, తెలంగాణకు నిరంతరం చేస్తున్న ద్రోహాన్ని గుర్తుంచుకోవాలన్నారు. ఒకప్పుడు దోపిడీ, వివక్ష, కన్నీళ్లలో మగ్గిపోయిన తెలంగాణ ఆ బానిస సంకెళ్ళను తెంచుకున్న పోరాట కథను గుర్తుంచుకోవాలన్నారు.

చరిత్రను మలుపు తిప్పిన దీక్ష..

చరిత్రను మలుపు తిప్పిన సమున్నత సందర్భాలలో కేసీఆర్ ఆమరణ దీక్ష ఒకటి అని, నవంబర్ 29, 2009వ సంవత్సరం ఉద్యమ చరిత్రలో ఒక ఉజ్వల దృశ్యంగా నిలిచిపోతుందన్నారు. ‘కేసీఆర్ సచ్చుడో.. తెలంగాణ వచ్చుడో’, ‘కేసీఆర్ శవయాత్రనా.. తెలంగాణ జైత్రయాత్రనా’ అంటూ ఆనాడు కేసీఆర్ ఇచ్చిన నినాదం సమరనాదంగా పనిచేసి మొత్తం తెలంగాణ జాతిని ఏకం చేసిందని, 11 రోజుల పోరాటంతో తెలంగాణలో పోరాటం పోటెత్తిందన్నారు.

కేసీఆర్ దీక్ష వల్లనే తెలంగాణలోని సబ్బండ వర్గాలు (రైతు, కార్మికుడు, ఉద్యోగి, లాయర్, డాక్టర్, జర్నలిస్ట్, ఎన్నారైలు) అందరూ కలిసి వచ్చి తెలంగాణ కావాలని కొట్లాడారన్నారు. కేసీఆర్ దీక్షకు దిగివచ్చి డిసెంబర్ 9 తేదీన తెలంగాణ ఏర్పాటుకు సంబంధించిన ప్రకటన వచ్చిందన్నారు. కేసీఆర్ దీక్ష కన్నా ముందు దాదాపు పది సంవత్సరాలపాటు మొండి ధైర్యంతో, గుండె ధైర్యంతో గులాబీ జెండా ఎగరేసిన కేసీఆర్ ఆ మార్టిన్ లూథర్ కింగ్ మాదిరి ‘ఐ హావ్ ఏ డ్రీమ్’ అని ముందుకు సాగారన్నారు.

తెలంగాణ కోసం కలకంటూ, తెలంగాణ జాతికోసం తన పోరాటాన్ని ఇచ్చి సాధించిన మహా నాయకుడు కేసీఆర్ అని తెలిపారు. దీక్షా దివాస్ అంటే ఒక సందర్భం, ఒక సంఘటన కాదు అని, 60 సంవత్సరాల తెలంగాణ చరిత్రను తలుచుకొని, తెలంగాణ కోసం మరోసారి పునరంకితం కావాల్సిన రోజు అన్నారు. ఆగస్టు 15 రోజు జాతీయ జెండా ఎగరవేసి తెల్లదొరల దోపిడీని, బ్రిటిష్ వాళ్ల దుర్మార్గాలను గుర్తుచేసుకున్నట్లుగానే, నవంబర్ 29 దీక్షా దివాస్ నాడు, డిసెంబర్ 9 విజయ్ దివాస్ నాడు, జూన్ 2 తెలంగాణ ఆవిర్భావ దినోత్సవం సందర్భంగా ఇచ్చిన మాట తప్పి 1,000 మందికి పైగా బిడ్డల చావుకు కారణమైన కాంగ్రెస్ పార్టీని, లేలేత పిల్లల ఉసురు పోసుకున్న కాంగ్రెస్ ద్రోహాన్ని గుర్తుంచుకోవాల్సిన రోజు అన్నారు.

మరోసారి రాణి రుద్రమ, సమ్మక్క సారక్క, కొమురం భీమ్, సర్వాయి పాపన్న, చాకలి ఐలమ్మ వంటి వీరులందరి స్ఫూర్తితో ఈ తెలంగాణకు దక్కిన స్వాతంత్రాన్ని కాపాడుకుంటూ, ఢిల్లీ సామంత రాజుల నుంచి విముక్తి కల్పించాల్సిన అవసరం మరోసారి ఉన్నదని కేటీఆర్ తెలిపారు. 16 మంది ఎంపీలను జాతీయ పార్టీలకు కట్టబెడితే తెలంగాణ గొంతుక పార్లమెంటులో మూగబోయిందని ఆవేదన వ్యక్తం చేశారు.

ఉద్యమ పార్టీగా, తెలంగాణ కడుపున పుట్టిన పార్టీ, తెలంగాణను కడుపులో పెట్టుకునే పార్టీ బీఆర్‌ఎస్ అని, అలాంటి పార్టీ వల్లనే తెలంగాణకు బలం వస్తుందని, కేసీఆర్ గళంతోనే తెలంగాణ మరోసారి నిలబడుతుందన్నారు. మాయ మాటలతో మోసం చేసి అధికారంలోకి వచ్చిన కాంగ్రెస్ పార్టీ అరాచకాలను, అవినీతిని ఎప్పటికప్పుడు ఎత్తిచూపుతూ తెలంగా ణను కాపాడుకుందామని పిలుపునిచ్చారు.

ఫొటో ఎగ్జిబిషన్, డాక్యుమెంటర్ ప్రదర్శన

దీక్షా దివాస్ సందర్భంగా కేటీఆర్ తెలంగాణ భవన్‌లో తెలంగాణ తల్లి విగ్రహం, జయ శంకర్ సార్ కు నివాళులు అర్పించారు. తెలంగాణ ఉద్య మం, కేసీఆర్ దీక్ష, 2009 నుంచి 2023 పాలన వరకు చేసిన ఉద్యమం, స్వరాష్ర్ట సాధన, గెలుపు, పదేళ్ల సంక్షేమంపై చిత్ర ప్రదర్శన (ఫొటో ఎగ్జిబి షన్), బీఆర్‌ఎస్ అధినేత కేసీఆర్ ఉద్యమంపై డాక్యుమెంటరీ ప్రదర్శన ఏర్పా టు చేశారు.

దీక్షా దివాస్ ప్రాంగణం లో ఏర్పాటు చేసిన తెలంగాణ అమరవీరుల స్థూపానికి పూలమాల వేసి నివాళి అర్పించిన కేటీఆర్ దీక్షా దివాస్ డాక్యుమెంటరీని ఆవిష్కరించి, వీక్షించారు. ఈ కార్యక్రమంలో మాజీ మంత్రి తలసాని శ్రీనివాస్ యాదవ్, మహమూద్ అలీ, బండా ప్రకాష్, న గర ప్రజా ప్రతినిధులు,  పాల్గొన్నారు.