శ్యామ్ నాయక్ కు కాంగ్రెస్ నేతల సూచన..

కుమ్రం భీం ఆసిఫాబాద్: శ్యాం నాయక్ ను ప్రజలు తిరస్కరించారని అది మరిచిపోయి నోటికి వచ్చినట్టు మాట్లాడుతున్నాడని తన నివాసం ఉంటున్న రాజంపేటలో సర్పంచ్ స్థానాన్ని గెలిపించుకుంటే సరిపోతుందని కాంగ్రెస్ సీనియర్ నాయకుడు వసంతరావు సూచించారు. జిల్లా పార్టీ కార్యాలయం ఆవరణలో పార్టీ మండల అధ్యక్షుడు చరణ్ అధ్యక్షతన నిర్వహించిన విలేకరుల సమావేశంలో మాజీ ఎంపీపీ బాలేష్ గౌడ్ తో కలిసి హాజరయ్యారు. ఈ సందర్భంగా మాట్లాడుతూ డిసిసి సమక్షంలో శ్యాం నాయక్ విశ్వప్రసాద్ పై మాట్లాడడాన్ని ఖండిస్తున్నట్లు తెలిపారు. ఎన్నికల సమయం కావడంతో పార్టీని గెలిపించుకోవాల్సింది పోయి సొంత పార్టీ నాయకులపై విమర్శలు చేయడం విడ్డూరంగా ఉందన్నారు.

శ్యాం నాయక్ ఎంవిఐగా జిల్లా కేంద్రంలో పనిచేశారని జిల్లా వాసులకు ఆయన వసూళ్ళు తెలిసే ఓటు వేయలేదని దానికి మాజీ డిసిసిని బాధ్యుణ్ణి చేయడం సరైన విధానం కాదన్నారు. కాంగ్రెస్ నాయకుడు అనిల్ గౌడ్ తో పాటు ఆయన భార్యపై, జైనూర్ మార్కెట్ కమిటీ చైర్మన్ పై చేసిన వ్యాఖ్యలు ఖండిస్తున్నట్లు తెలిపారు. డిసిసి సమక్షంలో ఇంతగా మాట్లాడుతున్నప్పటికీ ఆమె స్పందించకపోవడం ఆయనకు వత్తాసు పలుకుతున్నట్లు ఉందన్నారు. జిల్లాలో పార్టీ బలంగా ఉందని దానిని దీనికి నిదర్శనమే ఎంపీ ఎన్నికల్లో వచ్చిన మెజార్టీ అన్నారు. నూతన డిసిసి ఇటువంటి వాటిని భవిష్యత్తులో జరగకుండా చూడాలని సూచించారు.

గణేష్, శేషారావు, సరస్వతిని మాజీ డిసిసి మోసం చేశాడని శ్యాం నాయక్ చెప్పడం విడ్డూరంగా ఉందని సీనియర్ నేతలను కాదని లాబీయింగ్ చేసి టికెట్ తెచ్చుకోలేదా అని ప్రశ్నించారు. కాంగ్రెస్ కార్యకర్తలు అంత విశ్వప్రసాద్ తోటే ఉన్నారని ఆయనకు కార్పొరేషన్ పదవి ఇవ్వాలని రాష్ట్ర నాయకత్వాన్ని డిమాండ్ చేశారు. సర్పంచ్ ఎన్నికల్లో జిల్లాలో అన్ని సర్పంచులు కైవసం చేసుకునేలా ప్రయత్నం చేస్తామన్నారు. ఎన్నికల సమావేశాల్లో ఎన్నికల్లో గెలుపు కోసం మాట్లాడాలి తప్ప సొంత నాయకులను విమర్శించకూడదని హితవుపలికారు. ఈ కార్యక్రమంలో కాంగ్రెస్ నాయకులు సలీం, రవీందర్, సాయి, కలీం, జావిద్, మహేష్ గౌడ్ వివిధ మండలాలు నాయకులు పాల్గొన్నారు.