17వ బెటాలియన్ కానిస్టేబుల్ మంచకట్ల అభిలాష్ అంతిమయాత్రలో కన్నీరుమున్నీరైన సహచరులు

తంగళ్ళపల్లి (విజయక్రాంతి): రాజన్న సిరిసిల్ల 17వ బెటాలియన్‌లో విధులు నిర్వహిస్తున్న 2013 బ్యాచ్‌కు చెందిన కానిస్టేబుల్ మంచకట్ల అభిలాష్(పిసి–473) నిన్న దురదృష్టకర పరిస్థితుల్లో మృతిచెందారు. ఈ ఘటనతో మొత్తం బెటాలియన్‌లో శోకచాయలు అలుముకున్నాయి. నిబద్ధత, క్రమశిక్షణతో పనిచేసిన అభిలాష్ మరణం పోలీసులు తీవ్ర దిగ్భ్రాంతిని వ్యక్తం చేశారు. అధికారులు, సిబ్బంది బెటాలియన్ ప్రధాన కార్యాలయంలో అభిలాష్‌కు ఘనంగా నివాళులు అర్పించారు.

రెండు నిమిషాల పాటు మౌనం పాటించి ఆయన సేవలను స్మరించుకున్నారు. అనంతరం బెటాలియన్ కమాండెంట్ ఎం.ఐ. సురేష్ ఆయన అంత్యక్రియల్లో పాల్గొని, భౌతికకాయానికి పూలమాలలు అర్పించి చివరి శ్రద్ధాంజలి ఘటించారు. తర్వాత అధికారులు, సిబ్బంది ఒక్కొక్కరుగా నివాళులు అర్పించారు. ఈ సందర్భంగా కమాండెంట్ ఎం.ఐ. సురేష్ మాట్లాడుతూ, అభిలాష్ విధి నిర్వహణలో ఎల్లప్పుడూ ముందుండే విధేయుడు. క్రమశిక్షణ గల, నిబద్ధతతో పనిచేసిన సిబ్బందిలో ఆయన ఒకరు. ఆయన మరణం పోలీస్ శాఖకు తీరని లోటు” అని అన్నారు. తమ సహచరుడిని కోల్పోయిన విషాదంలో 17వ బెటాలియన్ మొత్తం మునిగిపోయింది.