హైదరాబాద్: రాష్ట్రంలో కాంగ్రెస్ ప్రభుత్వం ప్రవేశ పెట్టిన బడ్జెట్-2025-26పై బీఆర్‌ఎస్ వర్కింగ్ ప్రెసిడెంట్, ఎమ్మెల్యే కెటి రామారావు(BRS Working President KT Rama Rao) తీవ్ర విమర్శలు చేశారు. బడ్జెట్లో కాంగ్రెస్ ప్రభుత్వం(Congress Govt) తన ఆరు హామీలను నెరవేర్చడంలో విఫలమైందని, వాటిని ఇప్పుడు విస్మరించి, వాటిని పక్కన పెట్టేసిందని ఆయన విమర్శించారు. కాంగ్రెస్ అధికారంలోకి వచ్చాక ఇది రెండో బడ్జెట్ అన్నారు. సీఎం రంకెలు వేయడం కాదు.. అంకెలు ఎందుకు మారాయో చెప్పాలని కేటీఆర్(KTR) డిమాండ్ చేశారు. పదేళ్ల ప్రగతి రథ చక్రానికి పంచర్ వేశారని మండిపడ్డారు. రూ. లక్షల కోట్లు అప్పుకు టార్గెట్ పెట్టారని తెలిపారు. రూ. 6 వేల కోట్లు పార్టీ కార్యకర్తలకు పంచి పెడతారా? అని ప్రశ్నించారు.అది యువ వికాసం కాదు కాంగ్రెస్ వికాసం అవుతోందన్నారు. 420 హామీలపై ఎక్కడా ప్రస్తావించలేదని ప్రశ్నించిన కేటీఆర్ తులంగా బంగారంకు దిక్కులేదు.. ఆటో డ్రైవర్ల ప్రస్తావన లేదని వ్యాఖ్యానించారు.

స్విగ్గీ, జొమోటో వర్కర్స్ బోర్డు ప్రస్తావన ఊసే లేదన్నారు. 73 శాతం జీతాలను కేసీఆర్ పెంచితే.. టీఏ, డీఏల ప్రస్తావన లేదని ప్రశ్నించారు. అంబేద్కర్ అభయహస్తం ప్రస్తావించకుండా దళిత, గిరిజనులను మోసం చేశారని ఆగ్రహం వ్యక్తం చేశారు. ఈ బడ్జెట్ ఢిల్లీకి మూటలు పంపేందుకు ఉపయోగపడేలా ఉందని ఆరోపించారు. రుణమాఫీ జరిగిందో లేదో కాంగ్రెస్ నేతలకే అర్థం కావడం లేదని చెప్పారు. కాంగ్రెస్ నాయకుడు రాహుల్ గాంధీ(Congress leader Rahul Gandhi)ని కేటీఆర్ విమర్శిస్తూ హైదరాబాద్‌లోని అశోక్ నగర్‌ను సందర్శించాలని సవాలు చేశారు. అక్కడ ఒక సంవత్సరంలోపు నిరుద్యోగ యువతకు 2 లక్షల ఉద్యోగాలు ఇస్తానని ఆయన హామీ ఇచ్చారు. ఇప్పటివరకు ఎటువంటి ఉద్యోగాలు కల్పించలేదని, కాంగ్రెస్ క్రెడిట్ తీసుకుంటున్న 50,000 ఉద్యోగాలను వాస్తవానికి బీఆర్ఎస్ పాలనలో నోటిఫై చేసి నియమించారని ఆయన పేర్కొన్నారు. కాంగ్రెస్‌ను కరోనావైరస్ కంటే ప్రమాదకరమైన వైరస్‌తో పోల్చారు, ఆర్థిక దుర్వినియోగం తప్పు ప్రాధాన్యతలను కలిగి ఉన్నారని ఆరోపించారు. కాంగ్రెస్ ప్రభుత్వం యాదవులు, గౌడ్‌లు, దళితులు, గిరిజనులు వంటి వివిధ వర్గాల అవసరాలను తీర్చడంలో విఫలమైందని, వ్యవసాయం, ఉపాధి వంటి కీలక రంగాలను విస్మరించిందని ఆయన పునరుద్ఘాటించారు.