1. కులగణనపై ఓబీసీల జాతీయ సెమినార్...
2. ప్రధాని మోదీ నాయకత్వంతోనే చట్ట సభల్లో రిజర్వేషన్లు సాధిస్తాం
3. తెలంగాణ బీసీ జేఏసీ చైర్మన్ ఆర్ కృష్ణయ్య

ముషీరాబాద్, నవంబర్ 30 (విజయక్రాంతి): బీసీలకు అసెంబ్లీ, పార్లమెంట్ ఎన్నికల్లో 50 శాతం రిజర్వేషన్లు కల్పించాలని డిమాండ్ చేస్తూ ఓబీసీ జాతీయ సెమినార్లు జరిపేందుకు డిసెంబర్ 10న చలో ఢిల్లీ కార్యక్రమం నిర్వహిస్తున్నట్టు జాతీయ బీసీ సంక్షేమ సంఘం అధ్యకుడు, తెలంగాణ బీసీ జాక్ చైర్మన్, ఎంపీ  ఆర్ కృష్ణయ్య తెలిపారు. ఆదివారం బషీర్‌బాగ్ ప్రెస్‌క్లబ్‌లో బీసీ సంక్షేమ సంఘం జాతీయ కార్యదర్శి బాణాల అజయ్ కుమార్ అధ్యక్షతన ఏర్పాటు చేసిన సమావేశంలో ఆర్ కృష్ణయ్య మాట్లాడుతూ.. ఈ కార్యక్రమానికి ఆంధ్రప్రదేశ్, తెలంగాణ, కర్నాటక, ఒడిస్సా రాష్ట్రాల నుంచి పెద్ద ఎత్తున పాల్గొంటారని  తెలిపారు.

ప్రొఫెసర్లు, మేధావులతోపాటు ఈ సెమినార్‌లో 8 మంది కేంద్రమంత్రులు, 20 మంది వివిద పార్టీలకు చెందిన ఎంపీలు పాల్గొంటారని తెలిపారు. కేంద్రంలోని బీజేపీ ప్రభుత్వం తొలిసారిగా జనగణనలో కులగణన చేపడుతుందని, ఇది దేశ చరిత్రలో రికార్డు అని, 76 సంవత్సరాల స్వతంత్ర భారత చరిత్రలో  పార్టీ కూడా కులగణన చేయలేదన్నారు. కులగణన తర్వాత బీసీలకు అన్ని రంగాలలో జనాభా ప్రకారం వాటా లభిస్తుందన్నారు.

75 కోట్లకు పైగా ఉన్న బీసీ వర్గాల చిరకాల కులగణన డిమాండ్‌ను కేంద్రం గౌరవించినట్లుగా ఆయన పేర్కొన్నారు. 1931లో బ్రిటిష్ ప్రభుత్వం తీసిన లెక్కల తరువాత ప్రధాని మోదీ ప్రభుత్వం సాహసోపేత  నిర్ణయం తీసుకుందని ప్రశసించారు. కుల గణన తర్వాత బీసీలకు చట్టసభలలో 50% రిజర్వేషన్లు, కేంద్రంలో ప్రత్యేక మంత్రిత్వ శాఖ, జనాభా ప్రకారం విద్య, ఉద్యోగ రిజర్వేషన్లు పెంపు వంటి చారిత్రాత్మక నిర్ణయాలు కూడా తీసుకుంటారని కృష్ణయ్య ఆశాభావం వ్యక్తం చేశారు.

అన్ని రంగాల్లో బీసీల అభివృద్ధి ప్రధాని మోదీ ద్వారానే జరుగుతుందన్నారు. ఈ సమావేశంలో జాతీయ బీసీ సంక్షేమ సంఘం తెలంగాణ రాష్ట్ర వర్కింగ్ ప్రెసిడెంట్ నీల వెంకటేష్ ముదిరాజ్, బీసీ ఐక్యవేదిక రాష్ట్ర అధ్యక్షుడు జి అనంతయ్య, బీసీ విద్యార్థి సంఘం రాష్ట్ర కన్వీనర్ రాందేవ్ మోడీ, సి రాజేందర్, రాజు గౌడ్, టి రాజ్ కుమార్, చిక్కుడు బాలయ్య, నిఖిల్ పటేల్ తదితరులు పాల్గొన్నారు.