పూరీ: నూతన సంవత్సర దినోత్సవం సందర్భంగా గురువారం వేలాది మంది భక్తులు పుణ్యక్షేత్రమైన పూరీకి పోటెత్తారు. సోదర దేవతలైన బలభద్రుడు, సుభద్ర దేవి, జగన్నాథుడి(Puri Jagannath Temple) దర్శనం కోసం 12వ శతాబ్దపు ఆలయానికి బారులు తీరారు. పరిపాలనా యంత్రాంగం ప్రకటించినట్లుగా, ఆలయ ద్వారాలు తెల్లవారుజామున 1.55 గంటలకు తెరుచుకున్నాయి. సంవత్సరంలో మొదటి రోజున భగవంతుని ఆశీస్సులు పొందడం వల్ల తమకు విజయం లభిస్తుందని భక్తులు భావిస్తారు. ఆలయం ముందు క్యూలో చాలా తక్కువ మంది వృద్ధులు కనిపించారని ఒక అధికారి తెలిపారు. ఈ సందర్భంగా ఆలయంలో పూజలు చేయడం యువతలో ఒక ఉత్సాహంగా మారిందని ఆయన అన్నారు.