రవితేజ 75వ చిత్రం ‘మాస్ జాతర’. సితార ఎంటర్‌టైన్‌మెంట్స్, ఫార్చూన్ ఫోర్ సినిమాస్ పతాకాలపై సూర్యదేవర నాగవంశీ, సాయిసౌజన్య నిర్మించారు. తెలుగులో ఎన్నో విజయవంతమైన చిత్రాలకు రచయితగా పనిచేసిన భాను భోగవరపు ఈ చిత్రంతో దర్శకుడిగా పరిచయమవుతున్నారు. శ్రీలీల కథానాయికగా నటిస్తున్న ఈ సినిమాలో నవీన్‌చంద్ర ఓ కీలక పాత్రలో అలరించనున్నారు. అక్టోబర్ 31న సాయంత్రం స్పెషల్ ప్రీమియర్స్‌తో థియేటర్లలో ‘మాస్ జాతర’ సందడి మొదలు కానుంది. ఈ నేపథ్యంలో మీడియాతో ముచ్చటించిన దర్శకుడు భాను కొన్ని సినిమా విశేషాలను పంచుకున్నారు.

మాస్ జాతర ఎలా ఉండబోతుంది? ఏమైనా ప్రత్యేకతలు ఉన్నాయా?

ఇందులో మాస్ అంశాలు ఉంటాయి. అదే సమయంలో ఒక కొత్త పాయింట్ కూడా ఉంటుంది. రైల్వేపోలీస్ నేపథ్యంలో ఈ కథ జరుగుతుంది. ఆ నేపథ్యంలో జరిగే క్రైమ్ కొత్తగా ఉంటుంది. సన్నివేశాలు కూడా కొత్తగా ఉంటాయి. ‘మాస్ జాతర’ అనే టైటిల్ రవితేజ చెప్పారు. కథ విన్న తర్వాత వినోదంతోపాటు అన్ని అంశాలు బాగున్నాయంటూ ఆయన ఈ టైటిల్ సూచించారు. ఆ టైటిల్ తర్వాత నాపై బాధ్యత మరింత పెరిగింది. మాస్ అంశాలు మరిన్ని జోడించాను. థియేటర్‌లో ప్రేక్షకులు కొన్ని సర్‌ప్రైజ్‌లు చూడబోతున్నారు. 

ఏదైనా ప్రేరణతో ఈ రైల్వేపోలీస్ కథను రాసుకున్నారా?

ఇది కల్పిత కథే. అయితే ఈ కథ కోసం ఎంతో రీసెర్చ్ చేశాను. పలువురు రైల్వేపోలీస్ అధికారులను కలిసి వారి అధికారాల గురించి, వారు ఎదుర్కొన్న సంఘటల గురించి తెలుసుకున్నాను. వాటి స్ఫూర్తితో ఈ కథకు తగ్గట్టు కొన్ని సన్నివేశాలు రాసుకున్నాను. 

రవితేజ 75వ చిత్రానికి దర్శకత్వం వహించడం ఎలా అనిపించింది?

ఇది రవితేజ 75వ చిత్రమని మాకు ముందు తెలియదు. రవితేజకు కథ నచ్చి, సినిమా ఓకే అయిన తర్వాత.. అప్పుడు లెక్కేస్తే 75వ సినిమా అని తెలిసింది. కథ బాగుంది, ఈ నంబర్ల గురించి ఆలోచించకుండా ప్రశాంతంగా సినిమా చేయమని రవితేజ నన్ను ఎంతో ప్రోత్సహించారు.

నవీన్‌చంద్ర పాత్ర గురించి?

శివుడు అనే శక్తిమంతమైన ప్రతినాయక పాత్ర పోషించారు. ఈ పాత్ర కోసం మొదట వేరే ఇద్దరు ముగ్గురు నటుల పేర్లు కూడా పరిశీలించాం. కానీ, సంతృప్తి అనిపించలేదు. అలాంటి సమయంలో నవీన్‌చంద్రను కలిసి కథ వినిపించాను. ఆయనకు కథ నచ్చి సినిమా చేయడానికి అంగీకరించారు. నవీన్ గొప్ప నటుడు, అందులో సందేహం లేదు. అయితే ఈ పాత్రలో ఎలా ఉంటారనే ఉద్దేశంతో ప్రత్యేక మేకోవర్ చేసి, ఫోటోషూట్ చేశాం. ఆ లుక్ నిర్మాత నాగవంశీతో సహా అందరికీ నచ్చింది. శివుడు పాత్రకు నవీన్‌చంద్ర పూర్తి న్యాయం చేశారు. సినిమా విడుదలైన తర్వాత శివుడు పాత్ర గురించి అందరూ ప్రత్యేకంగా మాట్లాడుకుంటారు.

శ్రీలీల పాత్ర గురించి ఏం చెబుతారు..?

ఇందులో తులసి పాత్ర కోసం వేరే ఏ హీరోయిన్ పేరు మేము అనుకోలేదు. కథ రాస్తున్నప్పుడు నేను, కథ వింటున్నప్పుడు హీరో, నిర్మాతలు మాకు తెలియకుండానే.. హీరోయిన్ శ్రీలీల అని అనుకున్నాం. ధమాకా జోడి కాబట్టి శ్రీలీలను తీసుకోవాలనే ఆలోచన మాకు లేదు. తులసి పాత్ర అనగానే మా అందరికీ శ్రీలీల గుర్తుకొచ్చారు. ఆమె పాత్రకు సినిమాలో ఎంతో ప్రాధాన్యముంది. గత చిత్రాలతో పోలిస్తే ఇందులో శ్రీలీల కొత్తగా కనిపిస్తారు. గ్యాంగ్‌లీడర్‌లో చిరంజీవి, -విజయశాంతి మధ్య సన్నివేశాలు ఎలాగైతే కామెడీ టచ్‌తో మాసీగా ఉంటాయో.. ఇందులో రవితేజ, శ్రీలీల మధ్య సన్నివేశాలు అలా ఉంటాయి.

రచయితగా కామెడీలో మంచి ముద్ర వేసిన మీరు, దర్శకుడిగా మాస్ సినిమాతో పరిచయమవ్వడానికి కారణం?

మాస్ జాతరలో కూడా వినోదానికి పెద్దపీట వేశాం. మాస్ అంశాలు కూడా పుష్కలంగా ఉంటాయి. నిజానికి ‘సామజవరగమన’ లాంటి రొమాంటిక్ కామెడీ సినిమాతో దర్శకుడిగా పరిచయం అవ్వాలనుకున్నాను. అయితే ఎక్కువమంది మంచి మాస్ కథ ఉంటే చెప్పు అనేవారు. అలా ‘మాస్ జాతర’ కథ రాశాను. మాస్ కథ అంటే మొదట గుర్తుకొచ్చే పేరు రవితేజ. ఆయనను దృష్టిలో పెట్టుకునే ఈ కథ రాశాను. రవితేజ పోలీస్ సినిమాలు కొన్ని చేశారు. అందుకే కొత్తగా ఉండేలా ఈ రైల్వేపోలీస్ కథను  రాసుకున్నాను.

రవితేజ ఖాకీ డ్రెస్ వేస్తే విక్రమార్కుడు సినిమాతో పోల్చడం సహజం.. ఆ ఒత్తిడి ఏమైనా మీపై ఉందా?

నేను రవితేజకు అభిమానిని. ఆయన ఖాకీ డ్రెస్ వేసిన సినిమాలు ఎంతటి విజయాన్ని సాధించాయో తెలుసు. దాన్ని దృష్టిలో పెట్టుకొని స్క్రిప్ట్ విషయంలో ప్రత్యేక శ్రద్ధ తీసుకున్నాను.

ట్రైలర్‌లో రవితేజ వెంకీ, ఇడియట్ సినిమాల రిఫరెన్లులు కనిపించాయి..! 

రవితేజ ఐకానిక్ మూమెంట్స్‌ను సెలబ్రేట్ చేసుకోవాలనే ఉద్దేశంతో ఆ రిఫరెన్లులు పెట్టాం. అలా అని అవి కథకు అడ్డుగా ఉండవు. అభిమానులు సెలబ్రేట్ చేసుకునేలా ఉంటాయి.

మిగతా పాత్రల గురించి..?

రవితేజతోపాటు శ్రీలీల, నవీన్‌చంద్ర, రాజేంద్రప్రసాద్.. ఇలా అందరి పాత్రలు బాగుంటాయి. అన్ని పాత్రల మధ్య డ్రామా చక్కగా కుదిరింది. అందుకే రాజేంద్రప్రసాద్‌తో సహా ఈ సినిమా ఫలితంపై అందరూ అంత నమ్మకంగా ఉన్నారు.

భీమ్స్ సంగీతం గురించి..?

భీమ్స్ పేరును రవితేజ సూచించారు. వారి కాంబినేషన్‌లో ధమాకా లాంటి చార్ట్ బస్టర్ వచ్చింది. అందుకే నేను కూడా భీమ్స్ సంగీత దర్శకుడు అయితే బాగుంటుందనుకున్నా. ‘తు మేరా లవర్’ అంటూ ఆయన స్వరపరిచిన మొదటి గీతమే నాకు ఎంతగానో నచ్చింది.

యాక్షన్ సీన్స్ గురించి..?

యాక్షన్ సన్నివేశాలు అద్భుతంగా ఉంటాయి. ఈ సినిమాలోని యాక్షన్ సన్నివేశాల కోసం రవితేజ ఎంతో కష్టపడ్డారు. ఒకసారి కాలికి, మరోసారి చేతికి గాయాలయ్యాయి. అందుకే చిత్రీకరణ కాస్త ఆలస్యమైంది. అయినప్పటికీ, రవితేజ సహకారం వల్లనే ఈ సినిమాను ఒత్తిడి లేకుండా పూర్తి చేయగలిగాను.

నిర్మాత నాగవంశీ గురించి?

దర్శకుడిగా నాకిది మొదటి సినిమా అయినప్పటికీ నాగవంశీ ఎంతో మద్దతుగా నిలిచారు. నన్ను ఎంతగానో ప్రోత్సహించారు. ఖర్చుకు ఎక్కడా వెనకాడకుండా ఆరున్నర కోట్లతో స్టేషన్ సెట్ వేయించారు. జాతర ఎపిసోడ్ కోసం ఓ భారీ సెటప్ కూడా చేయించారు. ఓ కొత్త దర్శకుడికి ఇంతటి సహకారం అందించడం మామూలు విషయం కాదు.

మాస్ జాతర గురించి ప్రేక్షకులకు ఒక మాట చెప్పమంటే ఏం చెప్తారు?

రవితేజ సినిమా నుంచి ప్రేక్షకులు ఆశించే అన్ని అంశాలు ఉంటూనే ‘మాస్ జాతర’ చిత్రం కొత్తగా ఉంటుంది. హాస్య సన్నివేశాలు, యాక్షన్ సన్నివేశాలను కొత్తగా రూపొందించాం.

మీ నుంచి భవిష్యత్తులో వచ్చే ప్రాజెక్టులేంటి..?

రచయితగా కొన్ని సినిమాలు చేస్తున్నాను. అలాగే, దర్శకుడిగా రెండో సినిమా కోసం కథ సిద్ధం చేస్తున్నాను. పూర్తి వివరాలను త్వరలో వెల్లడిస్తాను.