నువ్వు ఏం చేయాలనుకుంటున్నావో

అది ఈ రోజే చేయ్

రేపు ఎప్పుడూ

మనది కాకపోవచ్చు

తప్పకుండా

మనకు చెప్పకుండా

మన అనుమతి లేకుండా

మనల్ని తీసుకుపోయే

క్షణమొకటి వస్తుంది

అప్పుడు నువ్వెంత

నోచ్చుకున్నా.. గింజుకున్నా

కాలధర్మంలో కలిసి పోవాల్సిందే

****

రేపటి కోసం

ఈ రోజునే నీ తండ్లాట చూస్తుంటే

మనిషి ఇంతెనేమోననిపిస్తుంది

కాస్త వాస్తవిక స్పృహలోకి రా...

****

ద్వేషాలు మోసాలు ప్రతీకారాలు వీడు..

వీలైనంత విశాలంగా ప్రేమించు

నువ్వు లేకున్నా

నీ మాట..నీ చేత 

బతికే వుంటుంది తెలుసుకో...

****

నిన్ను నువ్వు నిత్యం

అప్డేట్ చేసుకోకుంటే...

ఆసాంతం వెనకబడతావ్

గిర్రున తిరుగుతున్న

వర్తమాన పేజీల నుంచీ

నిర్తాక్షిణ్యంగా 

నీ అస్తిత్వ వాక్యం తొలగించబడుతుంది

****

నువ్వు నీ బాధల నడుమ

బందీ అయివున్నందుకు నిన్ను

అడుగడుగునా వేధించే వాళ్లు

బాధించే వాళ్లు కోకొల్లలుంటారు

అన్నీ లెక్క కట్టుకోకు

తలలో మూటగట్టుకోకు

కదులు ముందుకు చైతన్యంతో

****

ఈ ఉరుకుల పరుగుల జీవితంలో

నువ్వెంత బిజీగా ఉన్నా సరే..

ఇరుగుతోనో... పొరుగుతోనో..

స్నేహితులతోనో.. సన్నిహితులతోనో..

రోజూ ఓ పిడికెడు ప్రేమను పోగేసుకో..

****

నువ్వు మదినిండా ఎడ్వటమైనా

హృది నిండా నవ్వటమైనా...

బ్రతికున్నప్పుడే చెయ్య గలవ్

****

మంచో... చెడో..

కష్టమో...నిష్ఠూరమో...

నువ్విప్పటి వరకూ

బతికున్నందుకు శుభాకాంక్షలు !

****