పులి పాదముద్రలే తప్ప

మచ్చుకైనా లేని మేక వన్నెలు !

దేశాలవి గాని, దేహాలవి గాని

సార్వభౌమత్వాలు అన్నీ కర్ర బలం కిందే

నలిగిపోతున్నాయి స్వేచ్ఛా స్వాంతనలు లేకుండా !

ఖనిజాలూ కలేజాలూ

కబాబ్ పుల్లలు అవుతున్నాయి !

వాతలతో, మచ్చలతో, అవిటితనం తో

ఆవిరవుతూ, అరిగిపోతూ,

సొమ్మగిల్లిపోతున్నారు !

జలపాత వందనాలు ఆర్పిస్తున్నారు

దుమికి దుమికి

పల్లం వైపు పారి పారి పొలాలకి చేరినట్లు

పాదాభివందనాలతో ప్రణమిల్లుతున్నారు !

వేయి వేయి నామాలు

వల్లించ లేక

పిలిస్తే పలికేవాడా, పలుకులవాడా అని పిలుస్తున్నారు !

అర్ధించి అర్ధించి సుక్కిపోతున్నారు

పలుకులవాడా, దీవెనల వాడా !

ఆటాడుకోనీయవు కానీ

ఆటాడుకుంటావు అని

అలసి అలసి ఆలోచనలే చేయలేకపోతున్నారు !

అరుదుగానైనా

ఆరోగ్య బిరుదులు ఎవరూ పొందడం లేదని

చెమటలు చిందించి

శ్రమ వీర బిరుదులు పొందినవారే

ప్రతీ విపత్తులో ప్రథమ మరణం పొందుతున్నారని

పొగిలి పొగిలిపోతున్నారు పలుకులవాడా దీవెనల వాడా !

శిశిర పత్రాల్లా

అవశేష అవమానాలోచనలు రాల్చుకొని

దివారాత్రులు ఆరాధనా జ్యోతులగా నేత్రాలను వెలిగిస్తున్నా

వేదనా గదుల తాళాలు

కాపలా మనిషి తెరవడం లేదని ఒకటే కంగారవుతున్నారు

పలుకుల వాడా, దీవెనల వాడా !

వాస్తవం

ఏకముఖి కాదని, బహుముఖియని

తెలివిడి తలల నిండా నింపి

అవధుల్లేని ఆవేదనలను అరికడతావని

మౌనంగా చేతులు జోడిస్తున్నారు

జలపాత వందనం గావిస్తున్నారు పలుకులవాడా !