నారాయణపూర్: ఛత్తీస్‌గఢ్‌లోని నారాయణపూర్ జిల్లా(Narayanpur District)లో నక్సలైట్లు అమర్చిన ఇంప్రూవైజ్డ్ పేలుడు పరికరం పేలి రాష్ట్ర పోలీసులకు చెందిన డిస్ట్రిక్ట్ రిజర్వ్ గార్డ్ (District Reserve Guard) జవాన్ మృతి చెందినట్లు అధికారులు తెలిపారు. బుధవారం సాయంత్రం మావోయిస్టులతో జరిగిన పెద్ద ఎన్‌కౌంటర్ తర్వాత భద్రతా సిబ్బంది తిరిగి వస్తుండగా దట్టమైన అటవీప్రాంతమైన అభుజ్‌మద్ ప్రాంతంలో ఈ సంఘటన జరిగిందని సీనియర్ పోలీసు అధికారి ఒకరు తెలిపారు. నారాయణపూర్ మరియు బీజాపూర్ జిల్లాల సరిహద్దులోని అడవుల్లో జరిగిన ఈ ఎన్‌కౌంటర్‌లో నిషేధిత కమ్యూనిస్ట్ పార్టీ ఆఫ్ ఇండియా (మావోయిస్ట్) ప్రధాన కార్యదర్శి నంబాల కేశవ్ రావు అలియాస్ బసవరాజు (70) సహా కనీసం 27 మంది నక్సలైట్లు మరణించారు.

తిరిగి వస్తుండగా, బీజాపూర్ డిఆర్‌జికి చెందిన రమేష్ హేమ్లా అనే జవాన్ ప్రెజర్-యాక్టివేటెడ్ ఐఇడి(Improvised explosive device)పై కాలు వేయడంతో పేలుడు సంభవించిందని, ఆ పేలుడులో అతను అక్కడికక్కడే మరణించాడని పోలీసు అధికారి తెలిపారు. బుధవారం ఉదయం జరిగిన ఎన్‌కౌంటర్‌లో మరో డీఆర్ జీ సభ్యుడు ఖోట్లూరామ్ కొర్రామ్ మరణించాడు. కొర్రం నారాయణపూర్‌లోని ఓర్చా పోలీస్ స్టేషన్ ప్రాంతంలోని భట్బేడ గ్రామ నివాసి. గురువారం మధ్యాహ్నం 12 గంటలకు నారాయణపూర్‌లోని పోలీస్ లైన్స్‌లో మరణించిన ఇద్దరు జవాన్లకు పుష్పగుచ్ఛాలు ఉంచి నివాళులర్పించి, వారి మృతదేహాలను వారి స్వస్థలాలకు పంపుతామని అధికారి తెలిపారు.