కోల్‌కతా: ఇసుక, బొగ్గు అక్రమ రవాణా(Illegal coal trafficking) కేసులకు సంబంధించి ఎన్‌ఫోర్స్‌మెంట్ డైరెక్టరేట్ (Enforcement Directorate) మంగళవారం పశ్చిమ బెంగాల్, ఢిల్లీలోని పలు ప్రాంతాల్లో ఏకకాలంలో దాడులు నిర్వహించిందని అధికారిక వర్గాలు తెలిపాయి. కేంద్ర సాయుధ బలగాల సహకారంతో ఈడీ బృందాలు ఢిల్లీ, కోల్‌కతా, అసన్‌సోల్, దుర్గాపూర్, పశ్చిమ బర్ధమాన్ జిల్లాలోని ఇతర ప్రాంతాలలోని ప్రాంగణాలలో ఉదయం 6.30 గంటల నుండి సోదాలు నిర్వహించినట్లు అధికారులు తెలిపారు. 

సోదాలు జరిపిన ప్రదేశాలలో అసన్సోల్‌లోని కొత్తగా నియమితులైన బుద్బుద్ పోలీస్ స్టేషన్ ఆఫీసర్-ఇన్-ఛార్జ్ (Budbud Police Station Officer-in-Charge) మనోరంజన్ మండల్ నివాసం కూడా ఉందని పేర్కొన్నారు. ఈ సోదాలు అక్రమ ఇసుక, బొగ్గు వ్యాపారంపై జరుగుతున్న దర్యాప్తుకు సంబంధించినవని సీనియర్ అధికారి తెలిపారు. బుద్బుద్ పోలీస్ స్టేషన్‌లో ఇంకా అధికారికంగా బాధ్యతలు స్వీకరించని మండల్‌ను, గత సంవత్సరం బరాబని పోలీస్ స్టేషన్‌లో పనిచేస్తున్నప్పుడు అవినీతి ఆరోపణల కారణంగా సస్పెండ్ చేశారు.

తర్వాత ఆసన్సోల్ పోలీస్ స్పెషల్ బ్రాంచ్‌కు(Asansol Police Special Branch) అటాచ్ చేశారు. ఈడీ చర్యల నేపథ్యంలో, ఆయన్ను ఓసీగా తిరిగి నియమించడం ఇప్పుడు పరిశీలనలోకి వచ్చింది. ఆ ఏజెన్సీ ఆ ప్రాంతంలోని పలు ఇసుక, బొగ్గు వ్యాపారుల ఇళ్లు, కార్యాలయాలలో కూడా ఈడీ సోదాలు నిర్వహించింది. దుర్గాపూర్‌లోని సెప్కో ప్రాంతంలో, ఈడీ అధికారులు కేకే మినరల్స్ యజమాని అయిన ఇసుక వ్యాపారి ప్రబీర్ దత్తా(Sand trader Prabir Datta) నివాసంలో, అదే సమయంలో అతని సోదరుడు అమిత్ దత్తా ఇంట్లో కూడా ఏకకాలంలో దాడులు నిర్వహించారు.