మెగాస్టార్ చిరంజీవి కెరీర్‌లో సక్సెస్, జానర్ పరంగా చూస్తే ఒక ప్రత్యేకమైనదిగా ‘కొదమసింహం’ సినిమాను చెప్పుకోవచ్చు. చిరంజీవి నటించిన ఒకే ఒక కౌబాయ్ సినిమా ఇది. 1990, ఆగస్టు 9న ప్రేక్షకుల ముందుకొచ్చి ఘన విజయాన్ని సాధించిన ఈ సినిమాను ఈ నెల 21న 4కే కన్వర్షన్, 5.1 డిజిటల్ సౌండింగ్‌తో సరికొత్తగా రమా ఫిలింస్ అధినేత కైకాల నాగేశ్వరరావు రీ రిలీజ్ చేస్తున్నారు.

ఈ సందర్భంగా హైదరాబాద్‌లో ఏర్పాటు చేసిన సమావేశంలో స్పెషల్ వీడియో ద్వారా  చిరంజీవి ఈ సినిమాతో తనకున్న అనుబంధాన్ని గుర్తు చేసుకు న్నారు. చిరంజీవి మాట్లాడుతూ.. “నాకు కొదమసింహం ఫేవరేట్ మూవీ, అయితే నాకంటే రామ్ చరణ్‌కు ఈ సినిమా ఇంకా ఎక్కువ ఇష్టం. చిన్నప్పుడు తను వాళ్ల అమ్మ ఈ సినిమా క్యాసెట్ పెడితే కానీ భోజనం చేసేవాడు కాదు.

అంతగా చరణ్‌కు ఇష్టమైన సినిమా ఇది. ఈ జెనరేషన్ ప్రేక్షకులకు కూడా మనం చేసిన కౌబాయ్ సినిమా గురించి తెలియజేసేందుకు రమా ఫిలింస్ నాగేశ్వరరావు చేస్తున్న ప్రయత్నం అభినందనీయం” అన్నారు. ఈ కార్యక్రమంలో డైరెక్టర్ మురళీమోహన్‌రావు, నిర్మాత నాగేశ్వరరావు, మ్యూజిక్ డైరెక్టర్ కోటి, రైటర్లు పరుచూరి గోపాలకృష్ణ, సత్యానంద్ తమ అనుభవాలను పంచుకున్నారు.