డ్రగ్స్ రహిత సమాజం కోసం ప్రతీ ఒక్కరు కృషి చేయాలి

మంగపేట,(విజయక్రాంతి): యువత చెడు వ్యసనాలకు బానిసై జీవితాలను నాశనం చేసుకుంటున్నారని, యువత, విద్యార్థులు చెడు వ్యసనాలకు దూరంగా ఉండాలని  మంగపేట రెండవ యస్ఐ శ్రీకాంత్ అన్నారు. యువత చెడు మార్గంలో ప్రయాణించడంలో డ్రగ్స్ ప్రభావం అనే విషయంపై ఏటూరునాగారం సీఐ అనుముల శ్రీనివాస్, మంగపేట ఎస్సై టీవీఆర్ సూరి ఆదేశాల మేరకు మండల కేంద్రంలోని తెలంగాణ సెంటర్ లో  యువతకు, ఆటో డ్రైవర్లకు బుధవారం అవగాహనా సదస్సు నిర్వహించారు.

ఈ సందర్భంగా ఎస్సై శ్రీకాంత్ మాట్లాడుతూ యువత గంజాయి, మద్యపానం, ధూమపానం, మాదక ద్రవ్యాలు లాంటి చెడు వ్యసనాలకు దూరంగా ఉండాలని సూచించారు. డ్రగ్స్ రహిత సమాజం కోసం ప్రతీ ఒక్కరు కృషి చేయాలని అన్నారు. చెడు వ్యసనాల వల్ల కలిగే అనర్థాలపై అవగాహన కల్పించారు. ఎక్కడైనా, ఎవరైనా గంజాయి, డ్రగ్స్ రవాణ చేస్తున్నట్లు, విక్రయిస్తున్నట్లు తెలిస్తే పోలీసులకు సమాచారం ఇవ్వాలని, సమాచారం ఇచ్చిన వారి వివరాలు గోప్యంగా ఉంచుతామని అన్నారు.