ఎవరికీ గాయాలు కాలేదన్న అధికారులు

టెక్సాస్, జూన్ 19: స్పేస్ ఎక్స్‌కు చెందిన పదో స్టార్ షిప్ ఫైర్ టెస్టు సమయంలో పేలిపోయింది. స్పేస్ ఎక్స్ టెస్టింగ్ సైట్ మాన్సేలో గురువారం ఈ ఘటన చోటు చేసుకుంది. ఫైర్ టెస్టుకు సెకండ్ల ముందే స్టార్ షిప్ పేలిపోవడం గమనార్హం. ప్రయోగ వేదికపై ఉన్న స్టార్ షిప్ ఒక్కసారిగా పేలిపోవడంతో దాని శకలాలు గాల్లోకి ఎగిసిపడ్డాయి.

అయితే ఎవరికీ ఎటువంటి గాయాలు కాలేదని అధికారులు ప్రకటించారు. అంతరిక్షంపై పట్టు సాధిద్దామని అనుకుంటున్న మస్క్ కంపెనీకి ఇటీవల వరుసగా ఎదురుదెబ్బలు తగులుతున్నాయి. స్పేస్ ఎక్స్ కంపెనీ స్టార్ షిప్స్ వరుసగా విఫలం అవుతున్నాయి.

స్టార్ షిప్ పేలిపోయిన ఘటనను కంపెనీ ప్రతినిధులతో పాటు స్థానిక అధికారులు కూడా ధృవీకరించారు. స్థానిక అధికారులతో కలిసి ఈ ప్రాంతాన్ని సురక్షితంగా ఉంచేందుకు ప్రయత్నిస్తున్నట్టు స్పేస్‌ఎక్స్ ప్రకటించింది. స్టార్ షిప్ ప్రయోగం ఇప్పటికే మూడు సార్లు విఫలం అయింది.