9 మంది ముఠా సభ్యుల అరెస్టు

ఆస్ట్రేలియా పౌరులే లక్ష్యంగా మోసాలు

శేరిలింగంపల్లి, నవంబర్ 29 (విజయక్రాంతి): ఆస్ట్రేలియా పౌరులే లక్ష్యంగా అంతర్జాతీయ ఆన్‌లైన్ మోసాలకు పాల్పడుతున్న ముఠాను సైబరాబాద్ ప్రత్యేక ఆపరేషన్స్, బాలానగర్ సైబర్ నేర విభాగం బృందాలు పట్టుకున్నాయి. మాదాపూర్ అయ్యప్ప సొసైటీ ప్రాంతంలో నడుస్తున్న ఫేక్ కాల్‌సెంటర్‌పై శనివారం దాడులు చేసి, 9 మందిని అరెస్ట్ చేశారు. వారి నుంచి కంప్యూటర్లు, 21 మొబైల్ ఫోన్లు, నెట్ రౌటర్లు, వాహనం, ఇతర పరికరాలను స్వాధీనం చేసుకున్నారు.

ఖమ్మం జిల్లాకు చెందిన ప్రవీణ్, ప్రకాష్ అనే బంధువులు 2024లో రిడ్జ్ ఐటీ సొల్యూషన్స్ అనే పేరుతో ఈ నకిలీ కాల్‌సెంటర్‌ను ప్రారంభించారు. కోల్‌కత్తా నుంచి ఏడుగురిని హైదరాబాదుకు తీసుకువచ్చి ఆస్ట్రేలియా పౌరులను మోసం చేసే విధానంలో ప్రత్యేక శిక్షణ ఇచ్చారు. ముందుగా ఆస్ట్రేలియా పౌరులకు వైరస్ అలర్ట్ పాప్‌అప్ సందేశాలు పంపించి, మీ కంప్యూటర్ హ్యాక్ అయింది వెంటనే ఈ కస్టమర్ సేవా నంబరుకు కాల్ చేయండి అని భయపెట్టేది.

ఆ నంబరుకు బాధితులు కాల్ చేస్తే ఆ కాల్‌ను ఇంటర్నెట్ కాలింగ్ అప్లికేషన్ ద్వారా నేరుగా మాదాపూర్‌లోని ఈ ఫేక్ కేంద్రానికి మళ్లించుకునేవారు. అక్కడి టెలీకాలర్లు బాధితులను నమ్మబలికి రిమోట్ యాక్సెస్ యాప్ ద్వారా వారి కంప్యూటర్‌ను తమ నియంత్రణలోకి తెచ్చుకుని తర్వాత వారి ఆన్‌లైన్ బ్యాంకింగ్‌లోకి ప్రవేశించి భారీ మొత్తాలను ఆస్ట్రేలియాలో ఉన్న భారతీయుల బ్యాంక్ ఖాతాలకు మళ్లించేవారు.

ఆ తర్వాత ఆ డబ్బును హవాలా మార్గాలు, క్రిప్టో మార్పిడి, ఇతర రహస్య పద్ధతుల ద్వారా భారత్‌కు తీసుకొచ్చే వ్యవస్థను ప్రవీణ్‌ప్రకాశ్ నడిపినట్టు అధికారులు నిర్ధారిం చారు. ఈ విధానంతో గత రెండు సంవత్సరాల్లో రూ.810 కోట్లు వరకు మోసపో యినట్టు సైబర్ నేర విభాగం అంచనా వేస్తోంది. దాడిలో నిందితుల మొబైల్లో 45 ఆస్ట్రేలియా బ్యాంక్ ఖాతాల వివరాలు లభించాయి. అసలు వాడిన ఖాతాల సంఖ్య వందల్లో ఉండొచ్చని పోలీసులు భావిస్తున్నారు.

అరెస్ట్ అయిన తొమ్మిది మంది ఖమ్మం, కోల్‌కతా, ఒడిశా ప్రాంతాలవారు. వీరిలో కొందరు టెలీకాలర్లు కాగా, మరికొందరు రోజువారీ కార్యకలాపాలు, నివాస ఏర్పాట్లు చూసినవారని అధికారులు తెలిపారు. స్వాధీనం చేసిన పరికరాలు, బ్యాంకు వివరాల ఆధారంగా మరిన్ని బాధితులు బయటకు వచ్చే అవకాశముందని పోలీసులు చెపుతున్నారు.