ఎల్‌నినో ప్రభావం...ఆయిల్ ఫామ్ ఆరుతడి పంటలపై దృష్టి

– జిల్లా వ్యవసాయ అధికారి శివప్రసాద్

నర్సాపూర్ (హత్నూర): ఎల్‌నినో ప్రభావంతో వర్షాభావ పరిస్థితులు ఏర్పడే అవకాశాల నేపథ్యంలో రైతులు వరి సాగును తగ్గించి ఆయిల్ ఫామ్‌తో పాటు ఆరుతడి పంటల సాగుపై దృష్టి సారించాలని జిల్లా వ్యవసాయ అధికారి శివప్రసాద్ సూచించారు. హత్నూర మండలం కాసాల శివారులోని దౌల్తాబాద్ రైతు వేదికలో నిర్వహించిన విత్తన మేళాలో ఆయన మాట్లాడుతూ... భూగర్భ జలాల సంరక్షణ కోసం బోర్ల కింద వరి సాగును పరిమితం చేసి, కంది, జొన్న, అముదం, ఇతర పప్పుధాన్యాల వంటి ప్రత్యామ్నాయ పంటలను సాగు చేయాలని రైతులకు సూచించారు.

ఈసందర్భగా జిల్లా ఉద్యానవన శాఖ అధికారి పండరి, శాస్త్రవేత్త డా. అరుణ మాట్లాడుతూ, తక్కువ నీటితో అధిక ఆదాయం అందించే ఆయిల్ ఫామ్ సాగు రైతులకు అనుకూలమని తెలిపారు. ఒక ఎకరం వరికి వినియోగించే నీటితో నాలుగు ఎకరాల ఆయిల్ ఫామ్ సాగు చేయవచ్చని, ఈ పంటకు ప్రభుత్వం కనీస మద్దతు ధర కల్పిస్తోందని పేర్కొన్నారు. కార్యక్రమాన్ని జిల్లా న్యాయ సేవాధికార సంస్థ కార్యదర్శి సౌజన్యతో కలిసి ప్రారంభించగా, తహసీల్దార్ ఫర్హన్ షేక్, వ్యవసాయ, ఉద్యానవన శాఖ అధికారులు, ప్రజాప్రతినిధులు, రైతులు పాల్గొన్నారు.