కుత్బుల్లాపూర్, సెప్టెంబర్ 22(విజయక్రాంతి): కాంగ్రెస్ ప్రభుత్వం  అనాలోచిత నిర్ణయాలు తీసుకుంటుందని ఎంపీ ఈటల రాజేందర్ మండిపడ్డారు. గాజులరామారం డివిజన్లో ఆదివారం హైడ్రా అధికారులు అక్రమ నిర్మాణాలను తొలగించి నిరుపేదలను రోడ్డున పడేసారని ఫైర్ అయ్యారు. సోమవారం ఆ ప్రాంతాన్ని ఈటల సందర్శించారు. బాధిత కుటుంబాలను ఓదార్చి వారికి అండగా నిలుస్తామని హామీ ఇచ్చారు.

కబ్జాదారులను వెంటనే అదుపులోకి తీసుకొని వారి ఆస్తులను జప్తు చేయాలని ప్రభుత్వాన్ని డిమాండ్ చేశారు. కబ్జాదారులు రెవెన్యూ అధికారుల ప్రోత్సాహంతోనే నేడు ఈ నిరుపేదలు రోడ్డున పడడానికి కారణమని ఆరోపించారు. కబ్జాలపై మొదట్లోనే రెవెన్యూ అధికారులు చర్యలు తీసుకొని ఉంటే నేడు ఈ నిరుపేదలు రోడ్డున పడే దుస్థితి ఉండేది కాదని అన్నారు.

రెవెన్యూ అధికారులు ఈ ప్రాంతంలో కబ్జాలు జరుగుతూ ఉంటే ఆనాడు కళ్ళు మూసుకున్నారా ఇన్ని రూములు కట్టే దాకా ఎలా ఊరుకున్నారని, ఇది నిజంగా ప్రభుత్వ స్థలమే అయ్యుంటే ఇన్ని రూములు కట్టే వరకు రెవెన్యూ అధికారులు ఏం చేస్తున్నారని ప్రశ్నించారు.