మనకు ఎప్పుడైనా ఒకసారి ఓ పాము కనిపిస్తే.. భయం భయంగా చూస్తాం. ఒక్కోసారి ఒకేసారి నాలుగైదు పాములు చాలా అరుదుగా కనిపిస్తుంటాయి. కాని మీరెప్పుడైనా పాముల కుప్పను చూశారా? లేదు కాదా? అయితే వెంటనే ఈ పాముల గురించి తెలుసుకోండి. సరేనా.. ఎందుకంటే ఇవన్నీ కుప్పగానే ఉంటాయి. అసలు ఈ పాములు ఇలా ఎందుకు గుంపులుగుంపులుగా ఉంటాయి. ఇంతకీ ఇవి ఏం పాములు. ఎక్కడుంటాయి? ఏం చేస్తుంటాయో చూద్దామా.. 

చూడ్డానికి సన్నగా, నున్నగా, చారలతో కనిపిస్తున్న ఈ పాము పేరు గార్టర్. ఇది కెనడాకు చెందినది. ఇందులో దాదాపు 35 ఉపజాతులున్నాయి. ఈ పాములు మిగతా పాములతో పోల్చుకుంటే కాస్త వైవిధ్యంగా కనిపిస్తాయి. వీటి నేత్రాలు పెద్దగా ఉంటాయి. వీటిలో కొన్ని నీలం, పసుపు, ఎరుపు చారలతో ఉంటాయి. మరి కొన్నింటిలో అసలు చారలేమీ ఉండవు. 

అసలు నిజానికి ఈ పాములు కెనడాకు చెందినవి కావు. ఇవి ఇక్కడికి ఎలా చేరుకున్నాయో కచ్చితంగా ఎవరికీ తెలియదు. కాని.. ఎప్పుడో గతంలో ఎండుగడ్డి రవాణా చేసే సమయంలో ఇక్కడికి వచ్చి ఉంటాయని శాస్త్రవేత్తల అంచనా.. ఇక్కడి పరిస్థితులు అనుకూలించడంతో 2010 తర్వాత నుంచి వీటి సంఖ్య మరింత విపరీతంగా పెరుగుతుంది. 

నీళ్లలోనూ..

ఈ పాములు ఎక్కువగా పొలాలు, గడ్డిభూములు, చిత్తడినేలల్లో నివసిస్తాయి. చెరువులు, కాలువల్లోనూ కనిపిస్తాయి. ఇవి వానపాములు, జలగలు, బల్లులు, కప్పలు, ఎలుకలు, కీటకాలను ఆహారంగా తీసుకుంటాయి. చాలా తక్కువ సందర్భాల్లో మాత్రమే గుడ్లను తింటాయి. అసలు వీటికి విషం ఉండదని చాలాకాలం అనుకున్నారు.

కాని అదంతా అపోహే అని తర్వాత పరిశోధనల్లో తేలింది. ఇవి న్యూరోటాక్సిన్ ను ఉత్పత్తి చేసుకుంటాయి. కాని ఇది మనుషుల్ని పెద్దగా ఇబ్బంది పెట్టదు. కొన్ని సందర్భాల్లో ఇవి కరిచిన చోట వాపు మాత్రం వస్తుంది. ప్రాణాలకైతే పెద్దగా ప్రమాదం ఉండదు. 

మామూలు రోజుల్లో వేటికవే సంచరిస్తుంటాయి. కానీ శీతాకాలం వచ్చిందందటే చాలు.. అన్నీ ఓ చోటకు చేరుకుంటాయి. తమను తాము వెచ్చగా ఉంచుకునేందుకోసమే ఈ ఏర్పాటన్నమాట. ఇలా అన్ని కుప్పగా వచ్చాక.. నెమ్మదిగా ఒక్కక్కటే శీతాకాల నిద్రలోకి జారుకుంటాయి. మళ్లీ వేసవి కాలం రాగానే వేటి దారిన అవి వెళ్లిపోతాయి. ఇవి ఒక రకమైన వెదజల్లడం ద్వారా ఒకదాని ఉనికి మరోటి కనుక్కుంటాయి.