హైదరాబాద్: బంగాళాఖాతంలో ఏర్పడిన తుఫాను వ్యవస్థ కారణంగా సెప్టెంబర్ 26-27 తేదీల్లో తెలంగాణ అంతటా భారీ నుండి అతి భారీ వర్షాలు(Heavy rains) కురుస్తాయని భారత వాతావరణ శాఖ (India Meteorological Department) అంచనా వేసింది. అధికారుల అభిప్రాయం ప్రకారం, సెప్టెంబర్ 25న అల్పపీడన ప్రాంతం అభివృద్ధి చెందుతుందని, ఇది సెప్టెంబర్ 26 నాటికి తుఫానుగా మారే అవకాశం ఉందని భావిస్తున్నారు. ఈ వ్యవస్థ సెప్టెంబర్ 27న దక్షిణ ఒడిశా, ఉత్తర తీరప్రాంత ఆంధ్రప్రదేశ్ మధ్య తీరం దాటే అవకాశం ఉందని వాతావరణ శాఖ అధికారులు వెల్లడించారు. 

సెప్టెంబర్ 26న ఆదిలాబాద్, నిర్మల్, నిజామాబాద్, జయశంకర్ భూపాలపల్లి, ములుగు, వరంగల్, హన్మకొండ, జనగాం, సిద్దిపేట, యాదాద్రి భోంగిర్, వికారాబాద్, సంగారెడ్డి, మెదక్, కామారెడ్డి జిల్లాల్లో 10 సెంటీమీటర్ల నుంచి 20 సెంటీమీటర్ల వరకు విస్తారంగా వర్షాలు కురిసే అవకాశం ఉందని తెలిపారు. సెప్టెంబర్ 27న ఆదిలాబాద్, కుమురం భీమ్ ఆసిఫాబాద్, నిర్మల్, నిజామాబాద్, వికారాబాద్, సంగారెడ్డి, మెదక్, కామారెడ్డి జిల్లాల్లో అక్కడక్కడా వర్షాలు కురిసే అవకాశం ఉంది. ఇప్పటికే నగరంలో కురుస్తున్న వర్షాలకు పలు ప్రాంతాల్లో ప్రజల జనజీవనం అస్తవ్యస్తమైంది. వర్షాలు కురుస్తున్న సమయంలో ప్రజలు అప్రమత్తంగా ఉండాలని అధికారులు హెచ్చరిస్తున్నారు.