హలో బాసు.. డిలీటెడ్ సాంగ్!

లెజెండరీ డైరెక్టర్ సింగీతం శ్రీనివాసరావు తన కెరీర్‌లోనే అత్యంత ప్రతిష్టాత్మకమైన ప్రాజెక్ట్ ‘సింగ్ గీతం’తో ప్రేక్షకుల ముందుకు వస్తున్నారు. భారతదేశపు తొలి మ్యూజికల్ ఫాంటసీగా రూపొందించబడిన చిత్రమిది. వైజయంతి మూవీస్, స్వప్న సినిమా బ్యానర్లపై నాగ్‌అశ్విన్ నిర్మించిన ఈ సినిమాలో ఆయాన్, అహల్యా బమ్రూ, శాలిని కొండేపూడి కీలక పాత్రలు పోషించారు. జూన్ 11న థియేటర్లలో విడుదల కానుందీ చిత్రం. ఈ నేపథ్యంలో శనివారం ఈ సినిమా నుంచి హలో బాసు సాంగ్‌ను మేకర్స్ లాంచ్ చేశారు.

దేవిశ్రీప్రసాద్ స్వరపర్చడమే కాకుండా ఉత్తాన భారిఘాట్ కలిసి ఆయన రాసిన పాట ఇది. దీన్ని వంశీ, ఆర్‌పీ కృష్ణాంగ్ పాడారు. ఈ సాంగ్ లాంచ్ ఈవెంట్‌లో డైరెక్టర్ నాగ్‌అశ్విన్  మాట్లాడుతూ.. “సింగ్ గీతం’ నుంచి ఒక డిలీటెడ్ సాంగ్‌ను రిలీజ్ చేస్తున్నాం. ఈ సాంగ్ చాలా బాగుంటుంది. కాకపోతే సినిమాకు తీసేయమని చెప్పారు (నవ్వుతూ). సింగీతం ప్రతి సినిమాకీ కొత్తగా ఆలోచిస్తారు. ఇది ఆయన లాంగ్‌టైమ్ డ్రీమ్ ప్రాజెక్ట్. ‘జాతిరత్నాలు’ తర్వాత నేను నిర్మిస్తున్న సినిమా ఇది.

ఆ సినిమాను ఎలా నవ్వుతూ ఎంజాయ్ చేశారో, ఈ సినిమాను కూడా అలాగే ఎంజాయ్ చేస్తారని ఆశిస్తున్నా” అన్నారు. నటుడు వంశీ మాట్లాడుతూ.. “ఈ సినిమాలో దాసు అనే క్యారెక్టర్ చేశా. ఆ పాత్ర చాలా కొత్తగా, చాలా ఫన్‌గా ఉంటుంది. సింగీతం సినిమాలో అవకాశం రావడం జీవితంలో చాలా అరుదు” అని చెప్పారు.