న్యూయార్క్: ఐక్యరాజ్యసమితిలో(United Nations) భారత శాశ్వత ప్రతినిధి, రాయబారి హరీష్ పర్వతనేని(Harish Parvathaneni) ఐక్యరాజ్యసమితి భద్రతా మండలి త్రైమాసిక సమావేశంలో ఆఫ్ఘనిస్తాన్‌లో శాంతి, స్థిరత్వం, అభివృద్ధిని ప్రోత్సహించడానికి భారత్ ఆసక్తిగా ఉందని చెప్పారు. భారత్, అఫ్గానిస్తాన్ మధ్య సాంస్కృతిక బంధం ఉందన్నారు. అఫ్గానిస్తాన్(Afghanistan) లోని భద్రతా పరిస్థితులను భారత్ నిశితంగా పరిశీలిస్తోందని వివరించారు. ఉగ్రవాదానికి వ్యతిరేకంగా ప్రపంచవ్యాప్త సమన్వయంతో కూడిన ప్రయత్నాలకు పిలుపునిస్తూ, ఐఎస్ఐఎల్, అల్ ఖైదా, లష్కరే తోయిబా, జైషే మహ్మద్ వంటి గ్రూపులు ఆఫ్ఘన్ భూభాగంలో కార్యకలాపాలు సాగించకుండా ఐరాస సంస్థలు, వ్యక్తులతో పాటు అంతర్జాతీయ సమాజం ప్రయత్నాలు చేయాలని కోరారు. ఏప్రిల్ 22న జరిగిన పహల్గామ్ ఉగ్రవాద దాడిని ఆఫ్ఘనిస్తాన్ ఖండించడాన్ని ఆయన స్వాగతించారు. చివరగా, ఆఫ్ఘనిస్తాన్‌కు కొత్త విధాన సాధనాలతో కూడిన తాజా విధానం అవసరమని  చెప్పారు. ఆఫ్ఘన్ ప్రజలకు మానవతా సహాయం అందించడం, సామర్థ్య నిర్మాణ కార్యక్రమాలను అమలు చేయడంలో భారత్ తక్షణ ప్రాధాన్యతలను పర్వతనేని హైలైట్ చేశారు.

ఆఫ్ఘనిస్తాన్‌పై అంతర్జాతీయ, ప్రాంతీయ ఏకాభిప్రాయం ప్రాముఖ్యతను తెలిపారు. ఆఫ్ఘనిస్తాన్‌లో యుఎన్ సహాయ మిషన్ (United Nations Assistance Mission in Afghanistan)కు భారతదేశం మద్దతును పునరుద్ఘాటించారు. సెప్టెంబర్ 1న సంభవించిన భూకంపంలో 2,000 మందికి పైగా మరణించిన తరువాత భారతదేశం చేపట్టిన తక్షణ సహాయ చర్యలను ఆయన గుర్తు చేసుకున్నారు. భారతదేశం 1,000 కుటుంబ గుడారాలు, 15 టన్నుల ఆహారాన్ని అందించింది. తరువాత 21 టన్నుల మందులు, పరిశుభ్రత కిట్లు, దుప్పట్లు , జనరేటర్లను పంపింది. యుఎన్ ఆఫీస్ ఆన్ డ్రగ్స్ అండ్ క్రైమ్‌తో భాగస్వామ్యాలు, మహిళలకు మాదకద్రవ్యాల పునరావాస కార్యక్రమాలు 600 మంది బాలికలతో సహా 2,000 మంది ఆఫ్ఘన్ విద్యార్థులకు స్కాలర్‌షిప్‌లను ఉటంకిస్తూ, భారతదేశం దీర్ఘకాలిక మద్దతును కూడా ఆయన సూచించారు.