13న కట్టప్ప జడ్జిమెంట్

‘బాహుబలి’ కట్టప్ప అంటే తెలియనివారుండరు. ఆ సినిమాలో కట్టప్పగా మెప్పించిన సత్యరాజ్ ప్రధాన పాత్రలో ఓ సినిమా రూపొందింది. ఆయనకు ఫేమ్ తీసుకొచ్చిన క్యారెక్టర్ పేరుతోనే ఈ సినిమా వస్తుండటం విశేషం. ‘తీర్పుగల్ విర్కపడుమ్’ అనే తమిళ చిత్రాన్ని తెలుగులో ‘కట్టప్ప జడ్జిమెంట్’ టైటిల్‌తో వస్తోంది. ధెరన్ దర్శకత్వం వహించిన ఈ సినిమాలో మధుసూదనరావు ప్రత్యర్థి పాత్రలో నటించగా, స్మృతి వెంకట్, హరీశ్ ఉత్తమన్, రవిప్రసాద్ ముఖ్య పాత్రలు పోషించారు.

దీనికి అపోలో ప్రొడక్షన్స్ పతాకంపై రావూరి వెంటక స్వామి నిర్మాత. ఇప్పటికే సెన్సార్ కార్యక్రమాలు పూర్తిచేసుకున్న ఈ సినిమాను జూన్ 13న తెలుగు రాష్ట్రాల్లో విడుదల చేయనున్నారు. మరి కట్టప్ప ఏ విషయంలో ఎలాంటి జడ్జిమెంట్ ఇచ్చాడో వెండితెరపైనే తెలుసుకోవాలని చెబుతోంది చిత్రబృందం.