హైదరాబాద్: ఫోన్ ట్యాపింగ్ కేసు విచారణకు సంబంధించి ప్రత్యేక దర్యాప్తు బృందం (SIT) విచారణకు హాజరయ్యేందుకు మాజీ ముఖ్యమంత్రి కల్వకుంట్ల చంద్రశేఖర్ రావు (కేసీఆర్) ఎర్రవల్లిలోని తన ఫామ్‌హౌస్ నుండి బంజారాహిల్స్‌లోని నందినగర్‌లో ఉన్న తన నివాసానికి చేరుకున్నారు. కేసీఆర్ వాహనాన్ని మాత్రమే నివాసంలోకి పోలీసులు అనుమతించారు. సిట్ విచారణ సామగ్రిని కేసీఆర్ నివాసానికి తీసుకెళ్లి విచారణకు సర్వం సిద్ధం చేశారు. శుక్రవారం తనకు జారీ చేసిన నోటీసుకు స్పందనగా కేసీఆర్ విచారణకు హాజరు కానున్నారు.

సిట్ విచారణ నేపథ్యంలో ఎలాంటి అవాంఛనీయ సంఘటనలు జరగకుండా హైదరాబాద్ పోలీసులు ముందస్తూ చర్యగా నందినగర్, దాని పరిసర ప్రాంతాలలో భద్రతను కట్టుదిట్టం చేశారు. నగరంలో ఎలాంటి అలజడి సృష్టించే ప్రయత్నాలను అడ్డుకోవడానికి బీఆర్ఎస్ కీలక నాయకులపై నిశిత నిఘా ఉంచారు. పోలీసులు బంజారాహిల్స్ సమీప ప్రాంతాలలో ట్రాఫిక్ ఆంక్షలను విధించారు. శనివారం, ఫోన్ ట్యాపింగ్ కేసు విషయంలో తనను ప్రశ్నించడానికి సిట్ అనుసరిస్తున్న ద్వంద్వ ప్రమాణాలను కేసీఆర్ ఖండిస్తూ దర్యాప్తు అధికారి అయిన జూబ్లీహిల్స్ అసిస్టెంట్ కమిషనర్ ఆఫ్ పోలీస్ పి.వెంకటగిరికి లేఖ రాశారు. 

జనవరి 30 నాటి లేఖలో అధికారిక రికార్డుల ప్రకారం.. డిసెంబర్ 2023లో జరిగిన శాసనసభ సాధారణ ఎన్నికలకు సంబంధించి దాఖలు చేసిన అఫిడవిట్, అసెంబ్లీ రికార్డుల ప్రకారం ఉత్తర ప్రత్యుత్తరాల కోసం చిరునామాగా నంది నగర్ చిరునామా వెల్లడించడం జరిగింది. ఎర్రవల్లిలోని కేసీఆర్ ఫామ్‌హౌస్ లో విచారణ జరపాలన్న తన అభ్యర్థనను అధికారులు అంగీకరించబడలేదని పేర్కొన్నారు. ఈ విషయంలో ఎన్నికల అఫిడవిట్, అసెంబ్లీ రికార్డులలో పేర్కొన్న చిరునామాకు సీఆర్‌పీసీ 1973లోని సెక్షన్ 160 నిబంధనలతో ఎలాంటి సంబంధం లేదని మీరు గమనించవచ్చని తెలిపారు.

సిఆర్‌పిసిలోని సెక్షన్ 160 ప్రకారం పార్లమెంటు ఆదేశం ఏమిటంటే, 65 ఏళ్ల కంటే ఎక్కువ వయస్సు ఉన్న ఏ వ్యక్తిని పోలీస్ స్టేషన్‌కు రమ్మని అడగకూడదని, అతని వాంగ్మూలాన్ని అతను నివసిస్తున్న ప్రదేశంలోనే నమోదు చేయాలని ఆయన గుర్తు చేశారు. తను గత కొన్ని సంవత్సరాలుగా ఎర్రవల్లిలో నివసిస్తున్నానని, చట్టం ప్రకారం మీరు ఆయన వాంగ్మూలాన్ని ఎర్రవల్లి గ్రామంలోనే నమోదు చేసుకోవాలని, మరే ఇతర ప్రదేశంలో కాదని విజ్ఞప్తి చేశారు.