హైదరాబాద్: బీఆర్ఎస్ అధ్యక్షుడు కల్వకుంట్ల చంద్రశేఖరరావు (Kalvakuntla Chandrashekar Rao) రెండు సంవత్సరాల తర్వాత సోమవారం శాసనసభ సమావేశాలకు(Telangana Assembly sessions) హాజరయ్యారు. మాజీ ముఖ్యమంత్రి బీఆర్ఎస్ ఎమ్మెల్యేలతో కలిసి ఉదయం అసెంబ్లీ ప్రాంగణానికి చేరుకున్నారు. ఆయన హాజరు రిజిస్టర్‌లో సంతకం చేసి, శీతాకాల సమావేశాల ప్రారంభ చర్చలలో పాల్గొనకుండానే అసెంబ్లీ నుండి వెళ్లిపోయారు. శాసనసభకు వచ్చిన కేసీఆర్ ను సభ్యులు పలకరించారు. సీఎం రేవంత్‌ రెడ్డి(CM Revanth Reddy) సభలో కేసీఆర్‌తో కరచాలనం చేశారు.

కేసీఆర్ ఆరోగ్య పరిస్థితిపై ఆరా తీశారు. మంత్రులు శ్రీధర్ బాబు, ఉత్తమ్ కుమార్ రెడ్డి, కోమటిరెడ్డి, అడ్లూరి లక్ష్మణ్, సీతక్క కేసీఆర్ వద్దకు వెళ్లి అభివాదం చేశారు. సభలో మాజీ ఎమ్మెల్యేలు రాంరెడ్డి దామోదర్ రెడ్డి, కొండా లక్ష్మణ్ రెడ్డి మృతి పట్ల సంతాపం తెలిపారు. మండలిలో మాధవరం జగపతిరావు, అహ్మద్ పీర్ షబ్బీర్ కు సంతాపం తెలిపారు. తెలంగాణ శాసనసభ శీతాకాల సమావేశాలు సోమవారం ప్రారంభమయ్యాయి. ఈ సమావేశాల్లో ప్రధానంగా సాగునీటి సమస్యలు, తెలంగాణ, ఆంధ్రప్రదేశ్ రాష్ట్రాల మధ్య కృష్ణా, గోదావరి నదీ జలాల పంపకాలపై చర్చ జరిగనుంది. అసెంబ్లీ సమావేశాలు డిసెంబర్ 30, 31, జనవరి 1 తేదీలలో జరగవు, జనవరి 2న తిరిగి ప్రారంభమవుతాయి.