ఖానాపూర్ మున్సిపాలిటీ అత్యంత సుందరంగా తీర్చిదిద్దుదాం

ఖానాపూర్ ఎమ్మెల్యే, డిసిసి అధ్యక్షులు వెడమ బొజ్జు పటేల్

ఖానాపూర్,(విజయక్రాంతి): నిర్మల్ జిల్లాలోని ఖానాపూర్ మున్సిపాలిటీ అత్యంత సుందరంగా తీర్చిదిద్దుదామని ఖానాపూర్ ఎమ్మెల్యే డీసీసీ అధ్యక్షులు వెడమ బొజ్జు పటేల్ అన్నారు. బుధవారం ఖానాపూర్ మున్సిపాలిటీ నూతన పాలకవర్గం మొదటి సాధారణ సమావేశం జరిగింది. మున్సిపల్ చైర్మన్ అంకం మౌనిక మహేందర్ అధ్యక్షతన జరిగిన ఈ కార్యక్రమంలో ఎమ్మెల్యే పాల్గొన్నారు.

ఈ మేరకు ఖానాపూర్ పట్టణ అభివృద్ధి కోసం పలు తీర్మానాలు చేసినట్లు మున్సిపల్ చైర్మన్ మౌనిక తెలిపారు. పట్టణంలోని పలు వార్డులలో ప్రజల దాహార్తి తీర్చడానికి బోరు మోటార్లు ఏర్పాటు, మరమ్మతులు, దాంతో పాటు పట్టణంలో వేలాదిగా పెరిగిపోయిన కోతుల బెడద తీర్చేందుకు వాటిని మున్సిపాలిటీ ఆధ్వర్యంలో పట్టి వేరే చోటికి తరలించడానికి తీర్మానం చేసినట్లు ,దాంతోపాటు పట్టణంలోని ప్రధాన రహదారి విస్తరణ వంటి అంశాలపై చర్చ జరిగిందని తెలిపారు.