హైదరాబాద్,(విజయక్రాంతి): కాంగ్రెస్ అగ్రనేత రాహుల్ గాంధీకి బీఆర్ఎస్ వర్కింగ్ ప్రెసిడెంట్ కేటీఆర్ బహిరంగ లేఖ రాశారు. చేతి గుర్తుకు ఓటేస్తే చేతకాని ముఖ్యమంత్రిని తెలంగాణ నెత్తిన రుద్దారన్నారు. ఢిల్లీకి అందే మూటలపై తప్ప, ఇచ్చిన మాటపై శ్రద్ధ లేదా..?, తెలంగాణ బతుకు ఛిద్రం అవుతుంటే ప్రేక్షకపాత్ర వహిస్తారా..? అని కేటీర్ ప్రశ్నించారు. నమ్మి అధికారమిస్తే తెలంగాణ అస్థిత్వాన్ని దెబ్బతీస్తారా..? అని అడిగారు. ఆరు గ్యారెంటీలకు దిక్కులేదు, హామీలకు పత్తాలేదు, డిక్లరేషన్లకు అడ్రస్ లేదని ఆయన మండిపడ్డారు.

కాంగ్రెస్ పాలనలో అన్నదాతల నుంచి ఆడబిడ్డల వరకూ అందరూ బాధితులే అని, వ్యవసాయ వర్గం నుంచి పారిశ్రామిక వర్గం వరకు అందరూ వంచితులే అని ఆవేదన వ్యక్తం చేశారు. ఇందిరమ్మ రాజ్యమంటే ఇంటింటా నిర్బంధం.. సకల రంగాల్లో సంక్షోభం అని కేటీఆర్ విరుచుకుపడ్డారు. పదేళ్లలో పేదల బతుకులు మర్చాం తప్ప పేర్లు మార్చలేదని కేటీఆర్ విమర్శించారు. బీఆర్ఎస్ తలుచుకుంటే రాజీవ్ పేర్లు, ఇందిరా విగ్రహాలు ఉండేవా..?, ఈ నీచ సంస్కృతికి సీఎం రేవంత్ రెడ్డి పుల్ స్టాప్ పెట్టకపోతే జరగబోయేది అదే అని కేటీఆర్ హెచ్చరించారు.