న్యూఢిల్లీ: భద్రతా కారణాల దృష్ట్యా తదుపరి నోటీసు వచ్చేవరకు లాల్ ఖిల్లా ఢిల్లీ మెట్రో స్టేషన్(Lal Quila metro station closed) మూసివేయబడిందని ఢిల్లీ మెట్రో రైల్ కార్పొరేషన్ (Delhi Metro Rail Corporation) గురువారం తెలిపింది. సోమవారం సాయంత్రం ఎర్రకోట సమీపంలో జరిగిన పేలుడులో 13 మంది మృతి చెందగా, అనేక మంది గాయపడిన ఘటనపై భద్రతా సంస్థలు దర్యాప్తు జరుపుతున్నందున స్టేషన్ మూసివేయబడింది. "భద్రతా కారణాల దృష్ట్యా తదుపరి నోటీసు వచ్చేవరకు లాల్ ఖిల్లా మెట్రో స్టేషన్ మూసివేయబడుతుంది" అని డీఎంఆర్‌సీ ఎక్స్ పోస్ట్‌లో తెలిపింది. 

 లాల్ ఖిల్లా మినహా మిగతా మెట్రో స్టేషన్లన్నీ యథావిధిగా పనిచేస్తున్నాయని డీఎంఆర్‌సీ తెలిపింది. పాత ఢిల్లీ ప్రాంతంలో ప్రయాణించే ప్రజలు ఇబ్బందులను నివారించడానికి సమీపంలోని జామా మసీదు లేదా ఢిల్లీ గేట్ వంటి స్టేషన్లను ఉపయోగించాలని సూచించారు. మెట్రో స్టేషన్లలో అదనపు భద్రతా సిబ్బందిని నియమించారు. భద్రత కోసం అధికారులు యాదృచ్ఛిక బ్యాగ్ తనిఖీలు, ప్రయాణీకుల స్క్రీనింగ్‌లను నిర్వహిస్తున్నారు.  పేలుడు తర్వాత, చారిత్రాత్మక ఎర్రకోట చుట్టూ ఉన్న ప్రాంతాన్ని భద్రతా సిబ్బంది చుట్టుముట్టారు. పోలీసులు, ఫోరెన్సిక్ బృందాలు ఆధారాలను సేకరించడానికి సోదాలు నిర్వహిస్తున్నాయి.

లాల్ ఖిల్లా మెట్రో స్టేషన్ మూసివేయబడినందున, ప్రయాణీకులు సమీపంలోని ఈ క్రింది స్టేషన్లను ఉపయోగించాలని సూచించారు.

జామా మసీదు మెట్రో స్టేషన్ (వైలెట్ లైన్)

ఢిల్లీ గేట్ మెట్రో స్టేషన్ (వైలెట్ లైన్)

చాందినీ చౌక్ మెట్రో స్టేషన్ (ఎల్లో లైన్)