సంగారెడ్డి: సంగారెడ్డి జిల్లా వీరశైవ లింగాయత్ సమాజంలో నూతన పదవుల నియామకాలు పూర్తి అయ్యాయి. సమాజ అభివృద్ధి, కార్యక్రమాల సమన్వయం, సభ్యుల అనుసంధానం బలోపేతం దిశగా పలు కీలక బాధ్యతలను కొత్తగా నిర్వచించారు. ఈ నియామకాలు సమాజం జిల్లా అధ్యక్షుడు ఇప్పలపల్లి నర్సింలు ఆధ్వర్యంలో చేపట్టారు. సమాజ కార్యాచరణలో మార్గదర్శకత్వం, సలహాలు అందించడానికి వెన్న చక్రేశ్వర్, మరెల్లి అడివప్పలను గౌరవ సలహాదారులుగా నియమించారు. వారి అనుభవం సమాజ భవిష్యత్ కార్యాచరణ ప్రణాళికలకు ఉపయోగపడుతుందని పేర్కొన్నారు. 

ప్రత్యేకంగా మీడియా విభాగాన్ని బలోపేతం చేస్తూ, సమాజ కార్యక్రమాలు, సేవా కార్యక్రమాలు, అధికారిక సమాచారాన్ని ప్రజలకు చేరవేయడంలో కీలకపాత్ర పోషించేందుకు మాడపు శరత్ బాబును మీడియా అధికార ప్రతినిధిగా నియమించారు. సమాజ కార్యక్రమాలను సమయానుసారం సభ్యులకు, ప్రజలకు చేరవేసే బాధ్యతను ఆయన సమర్ధవంతంగా నిర్వహిస్తారని సమాజ నాయకులు విశ్వాసం వ్యక్తం చేశారు. అదే విధంగా, మీడియా రంగంలో సమన్వయం కోసం ఉల్లి గడ్డల శివకుమార్‌ను మీడియా గౌరవ సలహాదారుగా నియమించారు. సమాజ ప్రచార కార్యక్రమాల్లో ఆయన సూచనలు, మార్గనిర్దేశం కీలకంగా ఉండనున్నాయి. కొత్త నియామకాలతో సంగారెడ్డి జిల్లా వీరశైవ లింగాయత్ సమాజం మరింత సమగ్రంగా, శక్తివంతంగా సేవలు అందించేందుకు సిద్ధమైందని తెలిపారు.