జాతీయ పురస్కారానికి మాడిశెట్టి ప్రశాంత్ ఎంపిక

కుమ్రం భీం ఆసిఫాబాద్,(విజయక్రాంతి): ఇంటర్నేషనల్ వైశ్య ఫెడరేషన్ (IVF) ఆధ్వర్యంలో స్వామి వివేకానంద జయంతి సందర్భంగా సోమవారం కామారెడ్డి జిల్లా కేంద్రంలోని లక్ష్మీదేవి గార్డెన్‌లో ఉత్తమ రక్తదాతలు, ఉత్తమ రక్తదాత మోటివేటర్లకు జాతీయ పురస్కారాల ప్రదాన కార్యక్రమం నిర్వహించనున్నట్లు నిర్వాహకులు తెలిపారు. దేశవ్యాప్తంగా రక్తదాన కార్యక్రమాల్లో విశేష సేవలు అందిస్తున్న స్వచ్ఛంద సంస్థలు, ఎన్జీవోలు, వ్యక్తులను ఈ కార్యక్రమంలో సత్కరించనున్నారు.

2025 సంవత్సరంలో అధిక సంఖ్యలో రక్తదాతలను సమీకరించి, రక్తం అవసరమైన అనేక మందికి ప్రాణాలు కాపాడడంలో కీలక పాత్ర పోషించిన వారికి ఈ పురస్కారాలు అందజేయనున్నారు. ఆసిఫాబాద్ జిల్లా నుంచి ప్రజాసేవకుడు, రక్తదాత, బ్లడ్ డొనర్ ఆర్గనైజర్ మరియు మోటివేటర్ మాడిశెట్టి ప్రశాంత్‌ను ఉత్తమ రక్తదాత మోటివేటర్ జాతీయ పురస్కారానికి ఎంపిక చేసినట్లు IVF జాతీయ సీనియర్ వర్కింగ్ ప్రెసిడెంట్ ఉప్పల శ్రీనివాస్ గుప్త, IVF సేవాదళ్ రాష్ట్ర చైర్మన్ డాక్టర్ బాలు, కామారెడ్డి రక్తదాతల సమూహ అధ్యక్షులు జమీల్ హైమద్, గౌరవ అధ్యక్షులు డాక్టర్ వేద ప్రకాష్‌లు ఒక ప్రకటనలో తెలిపారు. జాతీయ స్థాయి పురస్కారానికి మాడిశెట్టి ప్రశాంత్ ఎంపిక కావడంతో పలువురు అభినందించారు.