ఎమ్మెల్యే ప్రేమ్ సాగర్ రావు

లక్షెట్టిపేట టౌన్, (విజయక్రాంతి): స్థానిక సంస్థల ఎన్నికలలో కాంగ్రెస్ పార్టీ అభ్యర్థులను గెలిపించేందుకు ప్రతి ఒక్కరు కృషి చేయాలని మంచిర్యాల ఎమ్మెల్యే కొక్కిరాల ప్రేం సాగర్ రావు కోరారు. శనివారం మంచిర్యాల నియోజకవర్గంలోని లక్షెట్టిపేటలోని విశ్రాంతి భవన ఆవరణలో దండేపల్లి, లక్షెట్టిపేట, హాజీపూర్ మండలాల కాంగ్రెస్ పార్టీ ముఖ్య నాయకులతో ఏర్పాటు చేసిన సమావేశంలో ఎమ్మెల్యే మాట్లాడారు. కాంగ్రెస్ పార్టీ సర్పంచ్ అభ్యర్థులను అధిక మెజార్టీతో గెలిపించాలని కార్యకర్తలను, నాయకులను కోరారు. తన ఆరోగ్యం బాగా లేకున్నా కేవలం నియోజకవర్గంలోని సర్పంచ్ అభ్యర్థుల గెలుపు కోసం వచ్చానన్నారు. కాంగ్రెస్ ప్రభుత్వ హయాంలో నియోజకవర్గంలో అభివృద్ధి పనులు చేశామని, ప్రజలు వాటిని గుర్తించి అన్ని గ్రామ పంచాయతిలో సర్పంచ్ లుగా కాంగ్రెస్ పార్టీ బలపరిచిన అభ్యర్థుల గెలుపునకు కృషి చేయాలని కోరారు.

రాష్ట్రంలోనే ఆదర్శం..

లక్షెట్టిపేటలో నిర్మించిన ప్రభుత్వ ఆసుపత్రి, పాఠశాల, కళాశాల తెలంగాణ రాష్ట్రంలోనే ఆదర్శంగా నిలిచాయని ఎమ్మెల్యే ప్రేం సాగర్ రావు సంతోషం వ్యక్తం చేశారు. అదేవిధంగా హాజీపూర్ మండలంలోని గుడిపేటలో మెడికల్ కళాశాల నిర్మాణం త్వరలోనే పూర్తికానుందన్నారు. ఇక్కడే ఐటీ పార్క్ ఏర్పాటు చేస్తున్నామని దీనివల్ల ఈ ప్రాంతంలోని రెండు వేల మందికి ఉపాధి ఏర్పడుతుందని ఆశాభావం వ్యక్తం చేశారు. దండేపల్లి, లక్షేట్టిపేట మండలాల్లోని రైతులకు కడెం, గూడెం లిఫ్ట్ తో రెండు పంటలకు నీరు పూర్తి స్థాయిలో అందుతుందని, దీని వల్ల పంటలు బాగా పండుతున్నాయన్నారు. రైతులకు అవసరం అయితే మూడవ పంటకు కూడా నీరు ఇవ్వడానికి కృషి చేస్తానన్నారు. 

నియోజక వర్గం లోని రైతులు ఎవ్వరు కూడా దొడ్డు వడ్లు పెట్టి నష్ట పోవద్దని, అందరు సన్నరకం వడ్లు పండించాలని కోరారు. ఏది ఏమైనా నియోజకవర్గంలోని అన్ని గ్రామ పంచాయితీల్లో కాంగ్రెస్ పార్టీ బలపరిచిన అభ్యర్థులు అత్యధిక మెజారిటీతో గెలిచి రాష్ట్రంలో నియోజకవర్గం ఆదర్శంగా నిలవాలని కోరారు. ఈ కార్యక్రమంలో మాజీ డీసీసీ అధ్యక్షురాలు కొక్కిరాల సురేఖ, కాంగ్రెస్ జిల్లా నాయకులు గడ్డం త్రిమూర్తి, లక్షెట్టిపేట మండల అధ్యక్షులు పింగళి రమేష్, పట్టణ అధ్యక్షులు ఆరిఫ్, మంచిర్యాల జిల్లా కాంగ్రెస్ పార్టీ ఉపాధ్యక్షులు చింతం అశోక్, మున్సిపల్ మాజీ ఫ్లోర్ లీడర్ చల్ల నాగభూషణం, దండేపల్లి మండల అధ్యక్షులు అక్కల వెంకటేశ్వర్లు, కార్యకర్తలు తదితరులు పాల్గొన్నారు.